清明相思
春节过脱后，隔手就是清明节来了。搿个天气就是蛮怪个，三日两头拉落雨，常庄拨人觉着阴丝丝个，我记得唐诗里就有“清明时节雨纷纷，路上行人欲断魂”个诗句，碰到空闲辰光脑子里自然会想起自家过世个长辈。因为我从小脱老爹、阿奶住拉一道，老人也经常讲眼做人个规矩脱再老里八早个事体。当时辰光听仔觉勿着啥，现在自家也老了，想想有眼事体蛮有道理个。像老爸常讲，人要争取走拉前头，勿要跟拉屁股头。虽讲我老爸只是退休后带我囡儿，勿过阿拉又吃、住拉一道好几年，告咾迭眼长辈拨我个印象侪老深、老深个，就像现在我还要争取老友所为。
前几年松江精神文明建设委员会办公室征文，要写各种节日里回忆和亲人个故事。其中我就写仔一篇《思念父亲》，回忆老爸晚年个一些拨我看来有深刻影响个事体，后来拨主办方拨伊当作优秀文章汇编进 《我们的节日征文选集》里。现在我拨伊改编成《寄往天国个一封信》。我就当爸爸住啦老远老远个天国里，用写信个方式脱伊讲讲心里闲话，我一面想一面拉写，写到心酸个辰光就会落出眼泪水。
寄往天国个一封信
亲爱个老爸：
眼睛一剎侬去世已有十一年了，而我仍旧常庄拉梦头里听到侬殷殷个教导我，就像垃昨日或今朝。老早仔侬拉辣外地工作，一年也难得回来一趟，对阿拉个要求又比较严格，告咾阿拉对侬觉着陌生而敬而远之，勿过侬一生克己持家、关爱小辈又会常拉闲话当中拨阿拉小辈感悟到做人个道理，有仔勿少个启发，好像留下仔一笔勿小个精神财富拨阿拉终身享用。老爸啊，侬个一言一行已拉辣阿拉心浪向刻下深深个烙印。
阿记得动迁搿年，侬积极配合市政建设，从市中心到郊区个七宝，住拉辣刚刚造好个住宅小区，听名称叫啥“花园”其实周围侪是野草丛生，除了空空个楼房，其它侪呒没啥，还经常缺水断电，生活极勿方便，我多次劝侬脱姆妈一道搬到阿拉附近去住。侬却担忧搬迁会拨阿拉生活增添麻烦，而常以小区周围日益个变化来宽慰阿拉：“倷放心，只要把倷自家个工作、生活安排好就可以了。”侬总对改革开放社会充满仔向往：“七宝好，七宝是我家”。
虽讲侬呒没啥文化，但侬总乐观个把自家融合到改革个社会中，2001年7月13日，患癌症手术不到一年侬就拖着虚弱个身体，拉辣电视机前倾听29届奥运会个申办结果。当国际奥委会主席萨马兰奇宣布“北京”个辰光，侬脱所有个中国人一样无比个激动，勿停个用“绢头”（手帕）揩眼泪水，面孔浪顿时立刻泛起红光，平常轻声轻气个喉咙，突然响仔交关：“我总算看到申奥成功个迭天了。”搿无疑拨伊衰弱个身体推进了一股强大个活力。侬是否记得担心个讲过“我能否撑得到举办个那天？”我鼓励侬要争当抗癌明星，到奥运会上再喊几声“加油”。侬慈祥个对我看看就讲：“即使我勿拉辣了，侬多叫几声也一样，中国人勿容易啊。”九个月后，2002年4月中旬，父亲终因医治无效，抱着对奥运会个无限眷恋离开了阿拉。今朝我欣慰地告诉侬，我国已成功地举办了迭届奥运会，还举办更精彩个上海世博会呢。拨整个世界刮目相看呐。侬对社会改革开放个热情期盼，促使我后来写下了散文《七宝好，七宝阿拉个家》、《父亲个遗愿》拨侬对祖国个深深眷恋之情融进文字里拨大家共享。
老爸啊，侬拉临终前头表达出无私忘我个精神，多次表示丧事从简，千万勿要惊动亲友相邻。甚至连我要通知外地工作个弟弟回来都勿允许：“反正我走后伊要回来个，省得伊多次来回，化钞票又影响工作。”难道侬勿想倪子？勿！侬是看到忧心重重个一家门勿想再增添阿拉个忧伤。侬勿断安慰阿拉：“勿要担心，人老了总有搿一天，大家只要安排好各家个生活，常回家看看，多多关心倷个姆妈。以后清明日脚 ，就买一朵鲜花纪念行了，万万勿要铺张啊。”多好个老爸呵，一生辛劳直至弥留之际仍念念勿忘个是人家啊。
老爸啊，侬只是一个普普通通个老工人，侬勿仅拨子女留下毫不利己个优良品质，拉辣单位里同样以兢兢业业助人为乐取信于别人，我至今保留着侬徒弟，时任个厂长脱工会主席感人肺腑个来信：“侯师傅，回想拉辣一道工作个情景，侬作为车间最老个师傅拨阿拉个支持脱帮助，让阿拉个样样工作侪做得有声有色，常受到厂领导个好评。阿拉现在厂里能担任搿能职务，迭是脱拉车间里打下个思想基础是分不开个，阿拉永远勿忘侬对阿拉个帮助脱支持……。”字字情真意切，读来真让人感动。
亲爱个老爸，每年清明，阿拉遵侬个关照手捧鲜花，遥祝侬拉天国快乐，保佑姆妈个健康，长寿！
儿 泣书 2013年10月
根据松江区文明委《我们的节日征文选集》里《思念父亲》改编
搿比传财产更有意义
就拉拨爸爸个信写好后，有一天，我翻抽屉辰光看到老爹送我个一枚1963年上海市“优秀工作者”奖章，又引起我个一番回忆，1963年辰光我才十二岁，是个懵懂个小人，只晓得老爹每天勤勤恳恳去上班，伊是一个煤炭中心点个送货员，就是为各门店送去北方人叫作“蜂窝煤”，阿拉上海人叫“煤并”个物事。回到屋里自家个门店里还要送煤球拨用户，邪气辛苦。勿过，我从来呒没听伊叫苦，总讲新社会了吃、穿勿愁。老爹一直讲一生中好多拉打仗逃难中死去个亲人，吃过苦头勿少。现在有份安稳个工作，看到拉辣身边个几个孙辈，伊心里就老满足了。老爹认认真真工作换来同事、领导个信任，拉每次评奖里总归是一等奖，呒没啥人勿服气。而老爹总觉着勿好意思，伊讲，工作大家拉做，我凭自己力气好多做眼也应该啊！我常庄听伊开导阿拉：领导浪布置个事体，勿要挑挑拣拣；跟同事道里合作勿要去争多少。想想看，凭老人家迭种能个工作态度，啥人还会勿满意呢？记得搿年上半年个一天，老爹难得穿了清清爽爽，我看勿懂就问伊要到啥地方去，伊神秘个讲：“去开会。”
会议一连好几天，每天老爹总蛮开心，平常闲话勿多个伊也讲起每天个新鲜事体，有辰光隔天还去买份报道昨日会议个报纸，识字勿多个伊会点出坐拉主席台浪几位领导：“呶，坐拉当中是老市长陈毅。”看得出老爹开心是伊也算见世面了。拿仔一套会议资料，对伊来讲就是摆摆样子，勿过伊当心得勿得了，一枚奖章是摸了又摸。要晓得迭份荣誉对老爹个身份来讲真是来之勿易啊！
现在我看到这枚囥了四十多年个奖章自然会有交关多个想法，想到迭些过世个长辈个家教拨我一生个影响，是用钞票也买勿来个。思前顾后又有文章好写了，题目就是：《一枚奖章》。
一枚奖章
手里拿仔一枚1963年由上海市人民委员会颁发拨拉荣获“先进工作者”外公个奖章，拉我心里泛起了一股暖流。奖章拨我整整囥了46年，勿论我碰到顺利还是勿顺利个辰光，只要想起外公拨我搿枚奖章辰光讲过个闲话，顿时立刻会感到深受鼓舞信心倍增。
拉辣1968年12月16日迭天，我要到拉辣闵行个上海电机厂去报到，迭是我人生中第一次离开屋里，正式踏上社会参加工作个辰光，已是两鬓白发个外公讲我长大了，出远门前要送一样礼物拨我留作纪念。我从小就跟外公、外婆一道生活，十分个亲热，照阿拉本地人亲热个称呼一惯叫两位老人“老爹、阿奶”。心想，两位老人舍不得离开大外孙，大概会送眼高档生活用品之类个。阿里（哪）晓得老爹拿出一只他平常辰光收藏“宝贝”个小盒子，拿出了迭枚刻有“1963先进工作者”字样个奖章，珍重地送到我手里，意味深长个讲：“老爹老了，高兴看侬长大、也工作了，小年轻第一要拨自家精力放拉工作脱学习进步浪向，上辈人总讲，传财、传物、传家当，呒没出息侪败光。老爹希望侬认认真真走正道，生活个路上勿管碰到多少委屈、困难跟打击，一定要做个有出息个人。”一番话，让我掂到手里迭枚奖章个分量。老爹啊，一晃侬离开我已有40年了，我也到了侬送我迭枚奖章个岁数。每当我看到奖章，就觉着侬仍然拉辣我身边对我有殷切期望。老爹啊，我没辜负侬个希望，在职个辰光我坚持不懈努力成了经济师；多年业余坚持写作，退休后也笔耕不辍又成了作家。迭就是侬个身传言教事事处处拉温暖我个心里。
我晓得老爹个闲话勿是讲大道理，老爹对迭枚奖章得来，真是勿大容易啊！老爹是个煤炭行业最普通个送货职工，拉辣讲究阶级成分个年代里，成份好个职工都勿容易评到先进，何况侬一个呒没背景个小业主能被评上市级个“先进工作者”搿是多少个难啊。工作迭些年来侬勿顾年纪大身体差，总是工作勤恳、任劳任怨地完成单位里安排个工作。每趟送完煤炭“生活”（工作）还帮人家拨周围个场地打扫得干干净净，深受客户个好评。计划供应前，就有不少顾客侪跨区、跨街来指名要侬去送货。因为侬襟怀坦白、与世无争，拉单位里个人缘邪好，常常拨领导跟同事们表扬、嘉奖。侬说自己虽然是苦出身，但新社会了就要自觉跟上新形势，改脱旧社会留拉海个商业习气，克己奉公全心为群众服务，侬年近六十岁那年，有一次送货拉狭窄个楼道里脱人家擦肩而过辰光勿当心碰翻仔人家个一镬子汤，侬勿顾自己个烫伤脱人家个指责，甚至有人为侬打抱勿平辰光，侬还是好言相劝个拿出票证脱钞票来作赔偿。我依个辰光人小见侬烫伤了还情愿赔钞票， 心里呴得想去“寻相骂”（吵架）。老爹侬还是制止了对我讲：“侬记牢了，任何辰光勿许气量小，为小事多计较要影响将来做大事体个。”我晓得老爹勿会讲闲话，其实就是“不以善小不为之，勿以恶小而为之”个古训嘛。
我记得1963年侬去开会辰光，单位许多领导跟同事侪来欢送侬，侬激动得说勿出闲话，连连讲：“勿好意思、勿好意思，我只做眼应该做个事。”穿仔一身难得清爽个衣服去了乘车集合点。每天虔诚个双手捧了个文件袋，面孔浪挂了无比个兴奋拨一家门侪带来喜悦，“今朝讲看到陈毅老市长了、明朝说大会个报告太鼓舞人心了。”讲着还抚摸迭枚奖章：“我要加倍个努力工作，才对得起迭个荣誉、对得起领导脱同事们拨我个信任啊！”会后，像宝贝样个放进小盒子囥仔起来。我深深晓得，迭枚奖章个意义拉老爹个心目中有多少个珍贵啊！
我哪能会忘记去工厂报到迭天，老爹侬勿顾年纪大还是亲自来帮我扛行李，一路浪仍旧是依依不舍个关照我，出门拉外要注意照顾好自家。一直送我到厂车个汇集地——徐家汇区委附近，眼看我上了车。车子开了老远，我回头再看，老爹依然立拉原地朝仔开出个汽车挥手、挥手……。
为啥清明要上坟
我要问出搿排里个问题勿是小儿科题目，真个回答好，勿是上网查查就好答得出个。现在个扫墓侬讲有多少人是真心诚意个，勿讲，大家也心里有数。照道理讲清明上坟是勿忘记自己从啥地方来，向祖宗感恩、向子女传承家训、家规最好个辰光。勿过闲话讲转来，现在自家真正要想到上坟去已算勿错了，那么有一眼人拉清明节做啥呢？
国家为尊重民风民俗，清明节列为国定假，拨大家有辰光去上坟扫墓，然而有人当作休假有墓勿去扫！搿里勿责备异地路远个人，但心目中要有追思亲人个意念，就是拉心里想想自家个所作所为是否对得起祖宗？净化眼自家个灵魂也好。比有墓勿想去扫，还有真正拨人啼笑皆非是反怪清明节放假勿好。再有种人对亲人活拉个辰光勿屑一顾，死后倒是功夫做足，又做道场，又烧纸作。我看就是怕“赤佬”（鬼）来寻伊算账，真是假惺惺！有感情的思念，就是到墓前说说心里和话，哪怕放段逝者生前喜欢的歌也行。近年来对殡葬个话题也多起来，一直有讨论。一个是墓葬土地有限，墓价年年上涨得拨人看勿懂，其次殡葬盲目奢侈与现代文明抵触。有必要对合理殡葬展开新个认识，2012年浦东滨海古园开展“我心中的 文明祭扫”个征文，我认真想了想，从自家对祭扫个认识以及谈社会浪一眼扫墓个离奇行为，最后讲出了殡葬改进个措施脱方向。希望大家从祭扫活动中拨自家个灵魂也有良好个提升。
以德为魂垂春秋
“清明时节雨纷纷，路上行人欲断魂”清明上坟祭祖宗是祖浪向千百年流传个习俗，借祭典亡灵教诲后人传承祖浪美德，来激发小辈奋发图强。
祭祀，我认为是阴阳相隔人相思个方式，应该是一桩神圣、严肃个事体 ，是拉抛开喧嚣嘈杂，摈弃浮躁、功利及脱仔焦虑个环境里去静心反思，深刻感悟人生；尊重逝者、珍惜生命、热爱生活，拨活辣海个人精神得到净化。搿才是文明人祭祀所应有个积极姿态脱境界。
随市场经济个发展脱精神文化个滞后，产生了祭祀畸形达到了勿可思议甚至是可笑个地步。祭品聚积了大量个精神糟粕，香烛、锡箔只不过是垫底，纸扎个“二奶、赌具、豪宅”啥个侪有。就是生前头尴尬、落魄，死后倒拨足风头，迭勿是缺乏祭祀意义个结果吗？现代精神文明应该对传统个殡葬脱祭祀活动客观个提出新思路，按与时俱进个观点，应该适时加以改进并掺进积极个新元素，才符合科学个发展观。我认为应该倡导“节地葬”像“树葬、花葬、草坪葬”勿失为绿色环保，文明个殡葬同时对文明祭扫也要提到绿色环保个层面。
为了避免集中辣拉清明当日个拥挤，除了错开辰光祭扫外，形式也可有多样化，管理部门用现代管理措施记录每位亡灵个生平资料做成电子文档，就像现在个网上祭奠真个勿错。随着空巢家庭脱仔移居海外子女个数量增多，勿能到墓区祭扫个小辈可以通过发短讯寄托自家个哀思；墓区或殡葬管理部门借机将征集内容积极向上、催人思绪感慨个文句刊载相关个电子屏幕上或者编撰文集，让更多个人通过祭扫了解阿拉前人个高风亮节，摈弃自己世俗偏见及浮躁心理、触发感恩理念，勿仅是传播一种新个祭扫方式，也拨每人多一次净化心灵个教育。
民政部门拉辣清明跟冬至辰光除了疏导脱管理丧家个殡葬活动，还可以像教会牧师那样，利用QQ、微信等聊天方式对丧家晚辈集聚拉心头个纠结，给予先辈式开导脱心理抚慰。联手文化教育部门多开展人生归宿个人文教育活动，组织各种专题会、朗诵会，公祭仪式，拨大家多了解眼科学个生死观，很自然地引导大家走出封建迷信活动，让大家自觉接受新个殡葬方式以及感恩先人个道德观，把祭祀亲人和告慰所有前人联系拉一道，岂勿是更加有意义吗。
要是到了迭种个辰光去祭扫，整个墓区就像花园搿能只见花草树木，春天鸟语花香、夏日蝉鸣虫叫、秋夜气爽宜人、冬晨银妆素裹与自然相得益彰。丧家怀着对先人个崇敬心情，自觉维护庄严肃穆个地方，完全拨生死融合拉天地之间，园内配以歇息设施供游人常年休闲放飞心情，间歇再放眼已故音乐家个悠扬乐曲，一改既往墓区墓碑林立、阴阳相隔个悲切氛围。让死者尊严、安息；让生者从中悟得生活个真谛脱仔珍惜生命个真正意义，传承历史汲取正能量动力。所以“我心中个文明祭扫”应该是迭能个纯洁脱坦荡。
根据2012年“古园杯”我心中的 文明祭扫征文集里征文改编
真个好想侬
三月下旬一个周末个清晨，五号线地铁剑川路站老清静。我正拉辣去站台个楼梯上，忽然听得后面有人磕绊个声音，回头一看是个五十岁左右个中年妇女，背了个袖珍播放器，手里一束白色个菊花也跌落拉辣楼梯口，我不由自主退回去帮伊拿起来，关切个问：“跌痛伐？”“勿要紧，谢谢侬。”伊抱歉个说着费劲个立了起来又呒没立稳，我马上扶牢伊，指指近旁个座椅去坐下，伊随手转过斜背腰里个播放器放拉辣“当门前”（怀里）。我想伊大概是去晨练或跳广场舞个。随口问伊：“天天坐搿班车啊？”伊讲勿是，是去扫墓个。哦，离清明节近了开始有人上坟祭扫了。我好像想起去年个冬至前几天个清晨，也是拉辣五号线个地铁浪，有个穿白颜色滑雪衫个妇女低拉个头拉辣轻轻个调试音响，也是一个袖珍播放器，放个是周冰倩唱个“真个好想侬”歌曲。我喜欢迭只歌，告咾印象蛮深。难道是伊？“带个播放器去扫墓？”伊见我有眼好奇，旁边人又不多，就带着忧伤个眼神，简要个讲起了原因。
女士姓尤，有一个囡儿定居国外，是个空巢家庭。夫妻两个情深意笃相携伴老，没想到三年前个一次事故老公去世了。临终前，老公叮嘱伊要么寻个可靠个人共度晚年或者去国外脱囡儿生活。要是真是想我了，就拨我放只歌，我喜欢听《真个好想你》，“心里也真个好想侬啊……。”老公迭番闲话让尤女士悲痛欲绝，一个人辰光经常会情不自禁“哭出呜拉”（哽咽）个唱起了这首歌：
真个好想你
我拉辣夜里呼唤黎明
天上个星星哟也了解我个心
我心中只有你
千山万水怎么能隔阻我对你个爱
月亮下面轻轻个飘着我个一片情
真个好想你……。
经过蛮长一段辰光个调正，尤女士才恢复正常情绪。伊感觉老公还是仍拉辣身边，勿想去国外，更没想到要再婚，伊讲心里想个就像歌词里唱个：“我心中只有你，千山万水怎么能隔阻我对你个爱”想着伊就够了。所以伊会每月来墓地陪伊讲讲闲话，伴着播放器唱迭首歌，就好像坐拉辣伊身边一道唱，冬天勿觉着冷，夏天也勿嫌热，唱啊唱，一年又一年伊勿感到孤独，照常老有所为，生活当中个凡事侪成了伊拉俩心灵对话个谈资。每逢冬至脱清明节个前头眼“日脚”（日子）还带上一束菊花来。伊讲，菊花勿像其它谢脱个花瓣，等待着一片片落拉地浪，“堕地良不忍，抱枝宁自枯”随口读起一句古诗，就是讲菊花坚守节操个象征。
我听了伊个凄美故事，对伊特有个祭扫形式勿觉着另类，只感到是人间真情个升华，是一种顽强精神个直接解释。可贵啊！跟伊些个薄养厚葬虚头怪脑个祭扫，岂不要更文明更雅致吗？
乘客慢慢多了，车也快来了伐，伊起身拿着捧花，脱我一道融进了乘车个人流中。
