谈谈过年个事体
“过年、过年，年年过，到仔年关年难过。”搿是从前老人常庄讲起个闲话，当然迭是讲旧社会到仔年底就要碰着仔停生意或者来讨债，心里侪要烦煞了。另外自家到仔老年了，想到老早眼老人讲：“过年，是小人开心，大人忙煞。”回过来想想正是迭能个。侬想老早辰光大家屋里个经济条件侪勿大好，休息日脚少，碰着仔过年么总想好好较歇歇，想过得像样眼，就要忙里忙外比上班还吃力；平常头里舍勿得用钞票，迭个辰光配给个年货总要买个，真是用钞票个辰光，阿是过年烦啊。小人又勿懂大人赚钞票个辛苦，只晓得过年么有吃、有新衣裳穿还有压岁钿，大家一道放炮仗，哪能会勿开心呢，顶好天天像过年辰光一样。
闲话“讲转来”（回来）吃力归吃力，过年么总归是大家闹猛个日脚，勿管是穷还是有钞票，大家凑拉一道照祖浪传下来个规矩，热热络络弄点吃吃寻寻开心是蛮扎劲个。
因为生活方式、思想观念有老传统，长期形成个民间习俗代代相传成为“老规矩”。譬如讲，年底大扫除叫“撣篷尘”，现在新公房平常弄得蛮清爽，过年只要稍微打扫就可以了；老早年前大家集中去混堂汰浴，“轧得”（挤）一沓糊涂，还叫轧闹猛，现在大多人家有卫生设施，勿会再去轧得像插蜡烛；还有从前个年夜饭，常常要老早准备交关腌个、酱个、晒个半成品，而现在超市、食品店现成个物事常常有；以前小人多年前汏被头、衣裳要几脚桶，勿要忒忙哦，现在有洗衣机、烘干机，随便啥辰光好汰，侬还要忙啥？现在好吃个 、穿好个勿要等过年样样有，人啦缺少盼头就呒没劲来。所以现在侪垃讲过年呒没老早有劲，近几年来要求继承老传统、习俗个呼声越来越高，关于老早过年个印象我还是蛮深个，前两年我写过眼文章，翻出来改编上海闲话咪道蛮赞个。
难忘老早个过年辰光
听我垃讲起老里八早过年辰光个扎劲，现垃排后生家心里觉着老奇怪：“有搿能嘎开心啊？”“当然咯，从前阿拉中国人侪“邪气”（非常）看重过年，就是穷人家也要按照仔老祖宗传下来个规矩想办法来寻开心。”
“年三十”又称仔“大年夜”，迭天大家个脚步匆匆，多数侪移向一个目标——“回转去”（回家）。全世界个华人侪会以传统个习俗来庆祝，大家侪沉浸垃除旧迎新、吉祥喜庆个气氛中。搿顿年夜饭就是象征一家门团团圆圆、合家欢乐并互相致以美好祝福个年末晚餐。迭个辰光只要侬能赶到，就是再晚屋里人也会等侬，图个就是割勿断个亲情。
从我记事个那年起，大年夜个印象就邪气深刻，用“忙碌”两字来形容实在勿会过头。单说搿顿年夜饭，要到处排队去买物事，就够侬折腾好几天。“日里头”（白天）屋里要大扫除、掸灰，还因当时大多数家庭呒没卫生设施，小孩脱老人们侪要赶早到外面头个浴室排队汰浴。集中个汰浴又拨浴室像轧塌，搿种排场势就像乡下头个赶庙会，场面邪气壮观，浴池里向人轧得“扒扒浦”（满满个）个个像插蜡烛一样垃搓“老垦”（皮肤上污垢）目的也是为了讨个口采“去晦”，以盼望来年事事吉祥。 我想搿也像是天主教个“洗礼”，以干净个身体迎接新个一年。
一顿年夜饭要忙仔一整天啦，煎、炸、炖、煮，凡能用个烧饭本事全豁上了。迭种平常“日脚”（日子）“难般”（难得）闻到个味道真是香得勿得了啊，一顿满台子个丰盛年夜饭就等一家们团圆。阿拉小人老早已经馋唾水嗒嗒滴，也勿顾大人个关照，伸手就拿好吃个小菜放辣嘴巴里了。按规矩要先敬祖宗，上香烛、三拜六叩祭奠后，大家才正式坐下来吃年夜饭，边讲边吃恭贺新禧。酒足饭饱之后，大家侪到外面场地浪去放“炮仗”（爆竹）。临街个炮仗声声此起彼伏，据讲搿种噼噼啪啪个声音可驱邪避难，大家垃迭个气氛中等来新个一年。勿过辣垃现在常有雾霾天气，有人建议还是少放眼为好。原来大家讲好迭天要整夜“守岁”， 就算没人催阿拉上床，过一歇眼皮撑勿牢，会自然闭下来乖乖睏着了。
大年夜，大家用个祝福语当中，“恭喜发财”比较频繁，市场经济嘛，有了铜钿钱好改善生活，搿句闲话只有垃改革开放后才敢讲，是“贫穷不是社会主义”个理论拨大家撑了腰。齐心协力搞建设，一心一意奔小康！大家追求个勿就是劳动致富提高生活质量，要是垃人人自危个文化大革命中是绝对勿能提个。记得有一年年三十，我同学个大阿哥准备结婚，凭了单位开个结婚证明去买“家生”（家具），为了一点小事脱商店个营业员发生了争吵。迭位大阿哥平常随便惯了，勿经意个讲仔句：“文化革命好，样样要凭票，还有买不到”。结果拨当作是“攻击社会主义制度，反对无产阶级文化大革命个‘现行反革命’”，拨单位里个造反派押回去作深刻检查。就垃大家吃年夜饭个辰光，伊却拨拖到自家门口批斗，作为“人民大众开心之日，就是反革命分子难受之时”个典型，演了场活报剧。当家家旧桃换新符贴春联个辰光，伊拉屋里门浪拨贴上仔两条警告语：“只许规规矩矩，不许乱说乱动”。差点把未婚妻也搞掉了。
天亮了，爷娘早垃阿拉个枕旁边放好簇新个衣裳，平常穿惯了补过个旧衣裳，搿辰光个开心劲勿讲了。起床前头大人再三关照：“新年里勿许瞎七搭八乱讲，要多讲吉利闲话。”还趁阿拉勿注意用草纸揩阿拉个嘴巴，意思是，童言无忌只当放屁。过年就是开心，勿单有穿新衣，还有压岁钿，平常钞票要勿到，迭天长辈们侪会主动拨阿拉。出门无论到啥人家，只要拱手鞠躬就有大把个糖果塞进侬袋袋里，平常日脚哪里有哇。
老法讲，年初一勿作兴访友，（除了娘家）只有叫花子才上门讨饭，“告老”(所以)邻舍道里只垃碰面辰光互相拱手恭贺新喜。年初二开始登门拜年了。大家忙仔一年，过年除了应酬外老少做其它家务，就是扫地也要从门口朝里扫，垃圾收集垃角落里勿许倒脱，迭叫“拢财”，惟恐把财运破了。要说可笑倒也是一种口彩，是大家企盼集聚财富个愿望。想想勿论贫富沿袭老祖宗个习俗，拨人有一种自觉传承个责任以及追求美好个希望，搿种能个精神就是蛮开心个。
根据刊登辣垃2010年2月11日《松江报》改编
拜 年
春节里拜年，是大家对新个一年祝福，也是中华民族个悠久传统。拜年是人们相互恭喜个一种新年礼仪，交关多个是小辈对长辈关怀个感恩或者是对师傅、老师尊敬个形式。我勿忘记小辰光跟仔大人一道去拜年个事体，心里正叫是热乎乎暖洋洋个。
从我记得事体起，大年初一是姆妈向过房娘拜年铁打个日脚。虽讲过房娘是没有血缘个社会关系，勿过姆妈是感恩过房娘对自己多年个深切关爱。姆妈老早呒没仔亲娘后就去做童工，是过房娘处处关心伊，时时个提醒甚至挺身袒护，让伊更加感受到有娘个温暖，有一趟姆妈突然觉着身体勿适意，去“马桶间”（厕所）辰光长眼了，有人就向拿摩温汇报。拿摩温来车间“寻齁势”（找茬），过房娘就出面脱拿摩温解释：“布面浪老是出现跳纱，是梭子出毛病了，我叫小姑娘去寻“机工”（机修工），机工查出毛病后就带小姑娘去拿“家生”（工具）了。”拿摩温听仔后挥挥手就走了。让姆妈免遭人家个欺负，所以垃姆妈个心里始终拿过房娘当亲娘来对待，还时常告诉阿拉：“做人要讲良心，勿可以此一事彼一事，平常嘛讲工作忙，新年里脱过房娘拜个年是一定要做到，否则心里会过意勿去。
年初二，是我陪阿拉外公去乡下头拜访亲眷个惯例。印象深个是，外公必定会去老宅浪有家我叫伊老太太个人家，迭个老人家已长期中风瘫垃床浪。每趟外公个到来，常常会拨老太太开心来，挥仔一个还好动手臂，拍打着床沿，意思是让座。嘴里咕噜、咕噜个讲含糊勿清个闲话，外公连忙上前去向老人家问好。迭老人家没亲生子女，身边只有一个跟垃多年个老“娘姨”（保姆）脱伊相依为命。外公常常向娘姨表示感谢。临走个辰光，外公总准备仔两只红包，一只拨老娘姨，一只放辣垃老太太个枕头边，祝伊拉平平安安。还叫我脱两位老人鞠躬，让伊拉是开心得笑了合勿拢嘴巴。听外公说，老人早年头家境邪好，住垃市里向。先生是做生意个，前妻有两个女儿侪垃“大世界”里唱京戏。“东洋人”（日本人）来打仗掼炸弹，拨阿拉个老房子侪烧脱了。一家门只好逃难到市内，垃走投无路个困难下，是迭位老太太慷慨个接济了阿拉，全家老小总算暂时落得仔安宁。外公每趟讲起搿桩事体总会感慨万分：“老人家是好人呐，好人就勿能忘记伊，要记牢，滴水之恩当涌泉相报，才是做人个本分。”所以每逢过年这歇能情真意切个拜年往事，总会垃我脑子里盘旋挥之勿去。
是啊，人间总有祸福旦夕，尊老爱幼人之常情，除了平常日脚帮困问候，过年了，借迭个民族佳节个浓浓气氛，用拜年个形式更能够体现人脱人道里个深深情感。但是，搿几年来拜年侪掺进了经济意识，甚至对压岁钱也有了经济指标，勿免拨人产生“殟塞”（心堵）。有年仔春节辰光，我垃辣地铁里就听到一对年轻夫妻脱小人下考核指标：“去年侬收到四千元压岁钱，今年应该收五千元是没问题，侬爷叔去年单身汉，今年结婚了，好向新婶婶拜年，收双份呀；向阿爷、阿娘拜年，祝伊拉养老金年年增加，压岁钿也要水涨船高。”旁边个爸爸也趁机寻开心了：“对！向外婆、外公拜年，压岁钿也要给力勿好低于往年。记牢！机勿可失，时勿再来。”还是小人讲出仔真话：“就是再多，统统被倷充公。倷倒门槛贼精，叫我当冲头。”老婆略有所思对老公讲：“侬身边勿是有张购物卡？就送拨阿拉爷娘。”丈夫为难个讲：“我早已送拨领导了，搿年头做人侪要活络点。”听了迭番耐人寻味个对话，我觉着老勿适意个，本来蛮清纯个拜年形式，哪能成了一些人借机啃老、生财之道了？
好垃辣迭两年中央加强反腐倡廉个力度，一再强调勿得以拜年个借口，搞勿正之风，风气也逐年好转，眼看新年又要到了，朋友们建议拜年勿拘泥礼数，关键多一眼人世间真情去关爱身边个长辈们，让体现浓浓情分个拜年传统继续成为大家诚挚个祝福吧。
进入现阶段，大家个生活节奏加快了，家庭结构小型化了。独生子女个小家庭难以顾及双方父母个盛情相邀，传统式个年夜饭也垃悄悄发生仔变化，由双方爷娘脱子女上餐馆共度年三十个新型年夜饭形式应运而生，七、八个人正好坐满一台子；甚至有人轧道到国外去吃“跨国年夜饭”呢 ，随后几日就是旅游了；啥人讲现代小区勿如往日石库门里人情侬，只要邻舍道里合得来，有人牵头大家一道来吃年夜饭，人多有劲啊！呶！侬看看勿少社区邻里欢聚个年夜饭也吃出了一番亲情。
年 夜 饭
“小赵啊，过年还是老规矩，我已脱李家伯伯、孙先生、刘老师侪讲好了，摆垃一道聚聚。赵家姆妈好伐？今朝让伊吃得开心点。”讲闲话是楼组长黄家姆妈。小赵听黄家姆妈搿能讲么，就想起仔去年个“年夜饭”了。
黄家姆妈讲个年夜饭老规矩，就是垃辣楼面里每年有一家主办，负责协调“小菜”（菜肴）及吃饭当中个即兴表演，当然还要发表祝酒词啥个，其他各家协办。垃辣电梯间拼起三只方台子，铺上两张一次性个台布，就成了一只摩登个大餐台了。大家勿讲排场地拿出事前商量好个冷菜、拼盆，色香俱全个佳肴顿时立刻成了美食展销。彼此谦让着长、幼，依次入座、举杯祝酒，眼门前马上就出现仔以往日脚大家庭里其乐融融过年个气氛。侪习惯了，新来个邻居也会马上拨感化辣垃搿能和谐个邻里气氛当中，已经搬出去个老邻居也会时常相约来聚一聚。
小赵姆妈七十开外，得老年痴呆症有好几年了。邻居侪邪气个关心伊。去年大年夜老人家有点感冒，搿天黄家姆妈照常去看过伊：“今天换件新衣裳，阿拉开开心过年了。”老太神态木嗒嗒个点点头。“黄家姆妈每天要来个，关心我姆妈比我还周到。”小赵工作忙，谈起黄家姆妈关心自己姆妈个辰光总感着过意勿去。吃好中饭后，小赵安顿姆妈午睡，抓紧外出置办年货，顺便帮黄家姆妈去邮局拿个邮件，马上回来脱大家一道准备年夜饭。想想姆妈辛苦仔一世，老来得子有了我。返城工作没几年，又碰着仔下岗，阿爸过世早，要勿是碰到搿些好邻居帮我照顾姆妈，又帮我寻工作，否则，搿些年勿晓得哪能过？虽讲我脱姆妈相依为命，但还应征了一句老话“远亲勿如近邻”。
当小赵喜匆匆回来，只见房门敞开，进门一看，勿好！老娘勿看见了。“姆妈，侬辣垃哪里？你出来啊。”小赵急忙辣垃屋里屋外到处寻。又辣垃走道上叫了几声。急切个呼喊声惊动了左邻右舍，大家侪出来打听。房间里只看见老太个床上乱作一团，“被头”（被子）半落辣垃地浪，鞋子还辣垃。一摸被头里，是冷个。估计是走了一段辰光了。“打110报警；还是大家帮忙分头寻？想想老人迟钝一时三刻走勿远。”大家垃出主意。还是刘老师镇定，拨大家作了分工：“黄家姆妈向派出所、居委报告，留下来等消息。其余同志带好手机，随时联络。”讲完么就带仔大家外出分头寻找。
辰光辣垃邻居个焦虑等待中溜过，发回来个消息侪是让人失望个，出去寻找个人也陆续个垂头丧气个回来了。大家没心思寻开心、闹猛准备年夜饭个气氛也一眼呒没了。小赵紧锁仔双眉拖着像灌了铅个双腿也回来了。大家只是勿断地安慰伊：“勿急啊，派出所也报了，居委也派人辣垃寻伊。”
就垃迭个辰光，有个警察走进楼道，大家以为赵家姆妈有消息了，围上去就问：“老太寻到啦？”警察疑问了：“啥个老太太？我是交通队个。孙键是住802室个？有家属吗？”黄家姆妈急忙问：“孙先生是802室个，刚出去寻找走失个邻居还呒没回来，老婆回乡下了。同志有啥事体？”警察说：“孙键被车子撞伤了，现在辣垃医院里。倷啥人跟我去一趟？”“哎呀，真是祸勿单行啊。还是我去。”小赵沮丧地说。刘老师阻止了伊：“还是我去吧，侬就等姆妈个消息。”小赵固执地说：“孙先生为寻我姆妈受伤，我一定要去。警察同志阿拉快走吧！”“我也要去看爸爸，我也要去……。”孙先生个倪子强强哭喊着奔了出来，拨黄家姆妈拉牢：“强强，听阿奶闲话，让赵家爷叔去接爸爸回来。”邻居们侪垂头丧气，有个还唉声叹气讲，真没心思做年夜饭了。
黄昏辰光，屋外头响起零星个鞭炮声噼噼啪啪个。走道里勿时听到有人垃打电话探听寻人个消息，显得那么个烦躁勿安，黄家姆妈拍拍强强：“乖小囡过年又要大一岁了，今夜头就住垃阿奶屋里了……。”就垃迭个辰光听到门口有人问：“黄家姆妈辣垃伐？”只见一个穿营业员制服个姑娘笑吟吟个拿仔一只蛋糕盒：“‘中浪头’（中午）赵先生定个生日蛋糕，好几次打电话通知伊，伊讲辣垃医院走勿开，让我直接送来了。”姑娘放下蛋糕就走了。稍许电话响了，黄家姆妈揿下免提键，电话里传来迫勿及待个声音：“赵家姆妈寻到了，现在就送回来。”来电话是居委主任小张。
“赵家姆妈寻到了”喜讯像油锅里滴水——炸开了。大家焦急地等垃辣电梯门口，像迎接贵客样个。小张扶着赵家姆妈出现辣垃大家面前感慨地说：和谐社会好人多啊，其实赵家姆妈呒没走远就辣垃勿远个乐购超市里，闷声勿响坐辣垃电器区域里看电视。辰光长了营业员问伊，看伊也呒没啥表情，大冷天又穿着拖鞋，晓得情况勿对，就叫来保安，正辣垃大家勿晓得哪能送伊回转来辰光，刚巧拨原先小区个邻居认出了，才拨伊送到居委里。当张主任了解到原来大家准备吃年夜饭个，是拨赵家姆妈个意外搅乱了，小赵还陪着孙先生呢。邪气个感动：“倷真是模范邻居啊，快去准备伐，我去接替小赵，让伊回来一道吃年夜饭。”讲完么就拨通小赵电话。小赵辣垃电话里谢谢大家，并讲今朝正巧是黄家姆妈个生日，还是垃拿邮件辰光从身份证上看到个，就定了个蛋糕收到伐？黄家姆妈激动个连连讲“收到、收到。”讲完，大家眼看着张主任个背影，就开心个忙着烧年夜饭等待着小赵个回来。搿正是：人间真爱沫春风，和谐社会故事多，邻居有难大家帮啊！
根据2010年入围浦东文明委征文改编
