贴近生活个作品侪勿错
上一章里讲到有人寻开心称我是征文“专业户”，笑话归笑话，勿过迭几年我写征文是写出“腻头”（瘾）来，只要发现有征文启事，我就来劲头，因为可以结合自家生活来写，勿用啥个花言巧语实话实讲。征文大多针对性强，只要抓牢主题，每趟活动里总有点奖励，几年下来我得奖个证书、奖品弄到仔勿少。最主要是拨自家有个奔头，老话讲得好，活老了、学到老，人老了出彩，像啥也做人也有眼腔调。
2014年第十六届上海中国艺术节穿插垃当年市民文化节里，组织一档“艺术中的真善美”征文，要求应征作者写出历年参与艺术节里个故事，以及今年艺术节里个所看到有关真善美个艺术作品。我对文艺方面勿太熟悉，一时头里写勿出物事来，勿过我开始对艺术节里个活动“生心”（关注）了。十月中旬我应邀去参加由闵行区文联召开，请作家叶辛畅谈伊参加“**垃文艺工作座谈会”个传达。里向勿少细节、提法，拨我写作也有启发，结合月底辰光垃南京路浪看到天天演里海安县演出个《梦里老家》节目，马上联想到艺术节征文。说明即使勿同地域方言个剧种，只要是反映老百姓生活，侪会看了老精彩个。乃么我就写出了一篇《好作品是心灵相通的》文章。正好拿叶辛传达习总书记讲个“温润心灵，传得开、留得下”作为好作品标准自然就拨我用到征文里去了。
征文发出没几天，我就辣垃网浪发现解放日报有记者发表一篇有关艺术节动态个文章里摘录了我征文个部分章节：“闵行区居民侯宝良以《好作品是心灵相通的》抒发艺术节‘天天演’的观后感。24日，他与江苏老友路过南京东路，恰逢海安县文化馆在世纪广场演出情景歌舞剧《梦里老家》。老友自豪地介绍，海安群文作品在江苏省名列前茅，曾参加过国庆五十周年天安门广场联欢会，这令侯宝良非常好奇，站着看完演出，“除了方言和市井吆喝不太懂，演员入木三分的表情与动作还是领会了，真没想到一个地方文化馆能编出这么接地气的文艺作品。”2015年1月征文揭晓，我获得了“十佳征文”个奖励，心里蛮激动就马上拨伊改编了上海闲话，咪道还是一样个。
附录:
2014年第十六届上海中国艺术节
“艺术中的真善美”征文比赛十佳获奖作品
编号姓名征文题目
1王洪盼“好节目惠民”的“艺术天空”常态常在
2高燕雯情思一片在冰心，纵膈天地两相重
3侯宝良好作品是心灵相通的
4薛龙彪饕餮大餐——记我和上海国际艺术节
5陈惠忠约会上海国际艺术节
6丁明玮情艺——记郑京和教授的大师班
7谢晓放从一首朗诵诗想起的
8薛鲁光天平秋韵绕“逸夫”
9王树和证书后面故事多
10王丽娜问人间，孰是知己(新编京剧《知己》赏析)
摘自2014年12月31日市民文化节官网
好作品是心灵相通的
一部好个文艺作品正像**总书记辣垃近段“文艺工作座谈会”上所讲是“温润心灵，传得开、留得下”个。从我观看第十六届上海国际艺术节“天天演”里江苏海安县文化馆演出个搿台《梦里老家》情景歌舞剧就有了切身个体会。
10月24日夜，我脱刚从江苏海安退休个老朋友垃荡南京路，路过世纪广场，发现舞台上灯火辉煌，载歌载舞，台下是人头传动热闹非凡。哦，我想起眼下正是“中国上海国际艺术节”期间是蛮热闹个，只侧头瞟了一眼也勿在意，继续朝前走。大概是朋友熟悉迭歌舞个音乐旋律倒收牢住脚步，我回头问伊：“侬想看？”朋友讲：“搿就是阿拉海安文化馆个原创歌舞剧《梦里老家》呀，哪能还来上海南京路演出？伊连忙拉着我朝舞台方向走去，我勿懂地方剧目，只是心不在焉跟牢伊，寻了空档地方“立拉嗨”（站着）看。朋友讲伊辣九月份辰光，垃南通市“濠滨夏夜”个海安专场里看过伊拉个演出，“勿错个!还好刚开始”看伊赞不绝口迭能样子 ，我也想看看到底哪能个“好”？
演员侪身穿民族服装，表演动作细腻用方言来讲，讲个是海安有个老阿奶脱孙子回老家路浪个所见所闻，边谈边忆当线索，侪是海安人道里个故事，统统传递人间真、善、美个高尚品质，勿仅反映了海安个现实，还体现了海安个历史。我除了方言以及路浪叫卖声勿太懂，可演员迭些入木三分个表情脱动作个沟通还是领会了，加上音乐个烘托、优美个舞姿还是把我带进了淳朴个海安。不由我深深地感叹“真没想到一个地方个文化馆能编出迭能接地气个文艺作品。”朋友见我如此个赞叹说：“看了勿错吧，海安个文艺辣垃南通甚至讲辣江苏省侪是前列个，‘海安花鼓’是海安个文化品牌，表现生活在水乡脱田头个姑娘以及面朝大海背朝田野个渔妇们喜、怒、哀、乐，曾参加过国庆五十周年天安门广场联欢会，获得过中国民间最高奖‘山花奖’呢。伊拉前几年就来参加过上海个国际艺术节，巧个是今朝拨阿拉碰着了。”看看迭海安籍个上海人迭副高兴劲，要是拨辣上海打工个新上海人搿辰光享受乡音个喜悦迭就更别提了。搿也说明了习总书记讲到个文艺要：“欢乐着人民的欢乐、忧患着人民的忧患”。搿样个作品才脚踏实地深受人民大众的喜爱。
“海安花鼓”能辣垃北京获奖，“海安歌舞”能辣垃上海立足，勿正说明她有传个开之魄力吗。侪说音乐没国界，艺术是人类共享个，无疑好个作品就是心灵相通个，呒没辰光脱空间所妨碍。
根据2015年上海中国艺术节获奖征文选改编
我欢喜写自家身边个事体
有人问我，侬哪能有嘎许多物事好写？我讲生活虽然平淡，勿过侬朝深里想，想透了同样一桩事体，就会咪道勿一样个。尤其是自家身边个事体交关熟悉，容易写。《新民晚报》夜光杯个“十日谈”版块有次征文要写《我的书房》：“书房，不仅是藏书之处更是心灵休憩之所。快节奏的现代生活中，归隐书房浸**香无疑是一种享受。”迭段独白提示就拨我有仔蛮多个感想，写文章个人侪有体会，勿讲要像样个书房，至少要有一个安静独立写字环境，可惜原来我住个地方小，一直没实现愿望，后来通过调房子，总算有仔一小间让我“一家头”（一个人）垃里向看书写字，最主要半夜里起来关紧房门写，啥人也勿影响。搿里离姆妈屋里又近，我原来个房间空着，等于我两面侪有写字个地方，对照《我的书房》要求我好写出自家个特色，打好腹稿马上就写出来了。可是报纸垃登迭组征稿辰光，就是迟迟勿登我个文章，想想大概是要“泡汤”（没希望）了，结果辣垃征文稿登了快结束辰光刊登了迭篇文章。同事、朋友看到后侪讲写得实实在在，读起来蛮爽个。我听仔又联想到几年前，我还写过一篇对写字台个感叹呢。勿仿翻出来统统改编成上海闲话版，摆垃一道倒也成为一组书房主题文章了。
殊途同归
我有两间书房，一间是辣垃姆妈屋里个书房，一间是自家屋里个书房。只有全面地介绍两间有勿同特点个书房，才殊途同归构成我心目当中完美个书房。
我老爸过世后，阿拉就经常来姆妈屋里居住，两室一厅个房间，垃我房间个床旁边摆一只写字台，台子浪放仔电话机、打印机接好电脑，一边搁一排常用个工具书搭仔随时要翻看个报纸脱杂志咾啥个。平时头没人打扰，我就垃迭搭写写文章、看报、上网，成了我心目中个微型书房。写文章个人侪有个特点，夜深人静辰光头脑里“一豁念”（一闪念），就是平常头里讲个“灵感来了”。哎，奇怪个就是过脱后灵感就会呒没来，再也没呒当时辰光个激情。抓牢搿个灵感一豁念交关要紧。但是辣垃搿“微型书房”里难以实现，侬想，老婆垃睏梦头里，侬突然有了奇思妙想就开起仔台灯，勿就要打散了伊个美梦吗？有辰光我只好揿开仔手电筒随笔记下来。迭能也有过交关个后悔。我老希望有间完整个书房，随心所欲个放飞我心灵中个寄托。
退休后，我脱老婆商量把阿拉原先个住房置换到姆妈屋里附近，一来互相便于照应，再讲让我“阿好”（也好）有间独立个书房，也算是圆我小小个梦想。老婆蛮理解我，一道来关心合适个房源。勿久，就觅到了近边头个两室两厅电梯房，南北直套个房间，北面一间虽小着眼，但采光勿错，正好做我个书房：“乃侬你满意了？”身后传来老婆期待我欣喜回答个问。我个回答也够全面个：“嗯，现在侪讲究双赢。对伐？”老婆也开心地笑了。
讲到书房里向个布置，其实也就是拨原先头女儿房间向个“家生”（家具）搬进去而已。伊出国去了，拿床架竖垃一边，书橱里个书经过一番整理，老多是我读过个书籍，还有不少是有我获奖征文汇编个专集，偶尔翻一翻自得其乐，蛮有自豪感个。虽呒没正规书房个气派搭仔雅趣，却满足了我个人读书脱写作个欲望。夜深人静辰光， 垃搿里我无所顾忌宣泄内心汹涌澎湃个急流，冲刷出一篇篇自鸣得意个文章初稿。然后发送到姆妈屋里书房个电子邮箱里，等待来日个深加工。早饭后，我惯例到姆妈屋里个书房“上日班”。
搿里个摆设照旧，床仍旧是冬铺被褥，夏铺席，有辰光下半日我“眼睛酸”（睏）了就拉此地打个“瞌充”（瞌睡）。勿过更多辰光我是垃“迭搭”（这里）完成稿件个修改、发邮件、看报以及上网，还可以接收外来个传真件或打印网上下载眼需要个资料。这书房个功能也很齐全啊。
“闲时辰光”（闲暇）我垃搿搭跟老娘亲切交谈，姆妈年记近九十岁，脑子思路“煞辣清”（十分清晰），我常常辣垃第一辰光里脱伊分享我得奖文章个喜悦，母子情深。有老娘辣垃，对年过花甲个我真是一生最大个福气。
夜饭后，我脱老婆回到仔自家个屋里了，我喜欢直接走进自家个书房，泡杯饮料浏览智能手机里朋友们发来个微信脱仔链接，老婆个眼力勿太好，看文字蛮吃力，有趣个图片我会叫伊来欣赏，一般个资讯，我会垃书房里读拨伊听听，还常常让她作为我文章个第一读者，听听她个评头论足，“迭搭块”（这里）充满了阿拉个欢声笑语，也算是阿拉爱情保鲜个地方。
搿就是我个两个书房，两个女人爱我、帮我成功个地方。
根据刊登 2014年12月16日《新民晚报》夜光杯版“十日谈”改编
勿贪价高只求缘分
“文化大革命”中期，上海摊浪各个旧货市场侪摆满了大量个抄家物资，勿少就是红木“家生”（家具）。爷娘老早就想买只合适个写字台拨阿拉小人做功课用，有一趟伊拉上街辣垃旧货店里看到一只成色勿错个红木写字台，标价100元。回转来脱住垃一道个我外公商量，呒没想到拨垃伊讲了一顿：“人家侪拨抄家卖出来，倷倒还有心思去买回来！”后来阿拉弟兄几个经常要争好个看书位置辰光，姆妈总会流露出眼“懊恼”（懊悔）。外公看垃眼里懊悔垃心里向。有天仔，外公兴匆匆个回来脱外婆商量后就一道出门了。
当日个夜里，我回到房间，只看见靠窗地方摆垃了一只大个红木写字台，像敞开仔胸膛垃迎接伊个新主人。我开心个坐垃写字台书前，欢喜个摸着平整个桌面，又勿断地拉开两旁个抽屉，完全没注意到外公已勿声勿响立垃我身后头：“送拨侬，欢喜吧？”“嗯！”我勿停个点头，“啥价钿？”姆妈垃旁边问。外公讲：“150元，据说还是一家兄弟为了闹分家才卖出个，勿肯便宜。”妈讲：“又贵（读ju）了，红木个家具就是随行就市，快谢谢外公呀。”
几年前，我想请红木修理商拨书桌整修一番。迭个修理工看后讲：“整修价钿勿便宜，还勿如高价卖拨我算了，侬可以再去买套简单个新家生。”我晓得伊垃“杠我末梢”（忽悠），拨我“回头”（拒绝）伊了。
动迁搬了新家后，勿少人也劝我：趁红木卖得出价，换只时尚点个写字台更好？我也晓得如今迭只写字台早已溢价几十倍，但红木品质高贵，这只写字台陪伴我遨游文海几十年，勿要讲伊有多大个升值，就是时常想想伴随伊亲热个回忆也让我舍勿得离开啊！
根据刊登2010年7月24日《新民晚报》百姓沙龙改编
