写点老年人个尴尬
文章就搿能接两连三个刊登了。有辰光还想想辣拉现在老人越来越多个社会里，交关老年人问题侪好谈出来，从自身个尴尬到有眼老人个勿识相作派侪好写眼出来，搿里主要是我也跨进了老年个行列了，周围个交关事体拨我个印象忒深了。尤其是看到社会浪相一面拉讲要关心、尊敬老人，一面是勿少新个家庭形式产生实际问题垃冒出来，像越来越多个空巢家庭、失独（失去子女）家庭就是独生子女个产物，辣我周围搿种人家屋里碰到有人生病或体力差个尴尬辰光就是一副苦相摆煞、怨煞。真正讲做好爱老、尊老个事体勿大容易啊。还有就是老人个寿命长了本来是桩好事体，说明社会安定、医疗发达，家有长辈健在好福气，但反过来一旦老年人丧失自理能力，而小辈也走进年老体差个时代了 ，现在叫“纯老”家庭，假使再碰着有个老年痴呆症啥个情况，乃么真正叫“天”（长辈）不应，叫“地”（子女）不灵，屋里真是“一天世界”（一团糟）迭种日脚叫人哪能过呕？
老年社会个勿少事体老早呒没碰着过个，现在随了社会变化侪会出现个，像老年“掼辣地浪”（跌倒在地）呒没人敢去搀，老早讲搿是没道德个，现在就是因为有种介老人不识好人心，搀仔伊了反而去诬告之人家乘机“拷竹杠”。乃么好了！现在拨大家吓了侪勿敢做好事体了。还有种个老人就欢喜倚老卖老自以为自，像啥自家出来一定要人家尊重伊，交关老妈妈早、夜锻炼个广场舞浪个喇叭响，吵得周围人家吃勿消还勿买账；乘拉公交车浪一定要人家让座位，有人急吼吼甚至还要动手打人，搿能一把年纪了真勿像腔调。侬勿要忘记要人家尊重，侬首先要尊重人家。搿排事体常庄会有个，看到越来越多了，心里熬勿牢就促使我写出了搿些：
讲讲伲老人搿辈里个事体
我跟瞿家姆妈讲：“屋里有老是个宝。”伊讲：搿是尊老爱老讲得好，人老珠黄勿值铜钿倒是真个。哪能讲法呢？“人老人怨”在所难免。力勿从心个老人自家想想也怨煞，要是再弄眼啥个涕涕拖拖【tata】事体，人家看了交关乌苏【杂乱而脏，使人难受】哪能会呒没眼怨气呢？最勿作兴个是 “狗咬吕洞宾，勿识好人心”搿辈老人，更加拨人家触气，迭种介事体辣生活当中常常碰得着个。
瞿家姆妈是个呒没脱子女住一道个“空巢”家庭，据讲上海搿种家庭要占到40%来。 伊讲：“就怕碰到勿方便个辰光，真叫拿只小矮凳也吃力，总勿见得样样侪叫邻居帮忙。”前抢辰光老夫妻俩偏偏叫一道生病：“葛真真【jinjin】烦规啦！多亏三楼蔡阿姨来相帮，和众【不然】想买块豆腐撞撞死脱算唻！”瞿家姆妈一口石骨铁硬个宁波闲话是怨气勿小。乃末讲起蔡阿姨屋里也是苦煞，老爸今年90岁，得老年痴呆症长远唻，现在像啥更加严重了。屋里两代人侪是老年人个“纯老”家庭数量越来越多。子女侪辣拉叫吃勿消：“刚刚拨伊吃好饭，就吐出来；换好衣裳一歇又湿透了，哎，侪是一大把年纪个人唻，哪能弄头？实在弄勿动啊。请保姆？大家懂啊，迭种吃力生活啥人肯来？再讲现在保姆开出个价钿，靠阿拉迭眼养老铜钿哪能来三哦？蔡阿姨想想自家将来也是迭副腔调哪能办？顶勿入调个是为老年人做好事非但呒没好报，还要拨诬告打官司，弄得现在是好人也勿敢做。阿拉撇开案子过程勿讲，就是危难中有人帮忙搭救总比呒没人救要好！哪能弄出”狗咬吕洞宾，勿识好人心“搿排里事体。乃末好，现在有人碰到难事，必须有先声明再帮助个尴尬局面。我想雷锋当时做好事仅拨人嘲笑是“傻子”，葛末，摆到今朝恐怕还要担心法律后果了。
讲之介许多老人搿辈里个事体，勿是我瞎三话四，真是今朝天天发生辣浪老年人越来越多。问题是搿种社会现象仅仅靠阿拉任劳任怨个态度解决勿脱个。
刊于2011年10月11日《新民晚报》上海闲话版
收入《浓浓沪语海上情》上海闲话精编集
碰着仔时髦个话题
我就迭能欢喜拿平常头里看到或想到啥就用上海闲话来写，常常忒编辑吕争老师联系，听听伊拨我眼指导。我嘛越写越起劲来，拉辣写上海闲话个同时，结合应时个社会热点，举出眼平常看到个例子，再摆进自家个看法，嗳，写出来拨大家看看也蛮有咪道（味道）。想想眼门前交关做爷娘个对屋里还没对象个子女“急出乌拉”（急吼吼）个样子，侬去看看人民公园里相亲地方，侪是老头、老太拿仔子女个资料拉“谈斤头”（交流），迭种排场势就像老早子拉马路浪向调房子。我想想阿拉也是过来个人，其实侪是“皇帝勿急，急太监”。搿里向有交关个原因，讲讲大家侪晓得婚姻要有缘分，老话讲，“有缘千里来相会，无缘对面勿相认”，按现在搿排“后生家”（年轻人）讲是“靠感觉”个，勿是单方面急得出来个，做爷娘拉瞎起劲冲拉前头有啥用场呢？
我后来才晓得每年个11月11日叫啥是“光棍节”，因为侪是“1”就像一根根光棍摆拉一道，老形象个。2011年11月11日，刚巧是3个11数碰拉一道，噢吆！搿是闹猛煞了，社会浪各种个活动侪老早出来搭车，我看得出勿少就是做生意个人正好来轧闹猛，乘机么赚一票个。乃么我拨几桩有关个相亲事体凑拉辣一道，就拨现在一眼小年轻个时髦闲话也用进来茄山河。比方讲，我拉地铁里听到一个小姑娘拉手机里叽里呱啦讲啥脱光佬啥个闲话，开起头我勿懂迭排里个省略语，初听听勿要太吓势势噢？再听下去终于晓得！哦，原来就是脱离光棍个意思，倒是阿拉迭排里个老头子跟勿上时代有眼拎勿清了。葛么就结合有关个内容快点拨伊当作题目就写出了下面个文章，侬看看阿是蛮好白相个。
脱光勿脱光个问题
11月11日是“光棍节”，蛮噱个。怪勿得近枪把交关组织侪搞各种轧朋友及相亲咾啥个活动。
搿天我乘地铁辰光像啥听旁边有个时髦“MM”垃煲手机：“嗳，侬啥辰光脱光啦？阿拉脱光唻！嗯，感觉还可以，乃阿拉爷娘心定了……”听得我汗毛竖起来了，哪能有迭能讲闲话法子个。再听下去方才恍然大悟，“脱光”原来是“脱离光棍”个简称。阿拉邻居老爷叔也起劲煞了，到处打听或托人帮忙为伊拉大龄囡儿寻对象。
其实婚恋是当事人自家个事体，有人相信一见钟情，就有了闪婚现象；也有人看重日久见人心，好事多磨成正果，乃末就有马拉松式个恋爱。有人认定随缘而遇，有缘千里来相会，无缘对面勿相认，就有坐怀不乱镇定自如该出手辰光就出手个大将风度。勿管阿里种思路，只要能过好日脚就好。想想阿拉侪是过来人，也理解爷娘个一片心意，真正美满个婚姻家庭，就是两家头心里想着对方，踏实过日脚。年轻人只要主观浪向有成熟个婚姻家庭意识，就会有主动寻朋友个驱动，啥个呒没机会？就看电视里向个相亲节目，场面一个比一个大，到底成功率有多少高？吃勿准。垃拉眼下迭个开放文明个社会背景下出现介许多大龄未婚男女，正是经济高度发展，情感思维掺杂过多利益所造成个。所以讲“脱光勿脱光”关键垃拉自身，垃拉整个社会个价值取向个转变。像邻居老爷叔一样个爷娘是有勿少，勿过迭个是可怜天下父母心，隔靴抓痒罢了。
刊于2011年11月15日《新民晚报》上海闲话
收入《浓浓沪语海上情》上海闲话精编集
帮大家反映民生问题
虽讲阿拉搿能把年纪个人要讲肚皮里向像老早过中秋节、邻居隔壁忙忙碌碌搿排里个故事是有眼个，样样侪写出来就勿晓得人家报纸是否侪好用？要晓得新民晚报是从来勿缺稿子个，难板碰着几趟登报真算是我有运道，额角头高了自家勿好骨头轻。勿过有人鼓励我再试试看，我通过跟吕老师个几趟合作，觉着迭个编辑老通人情个，我也就愿意直截了当“脱伊”（和她）“汰汰”（谈谈）“伊排里”（那些）创作个想法。“像对当前老年人个事体、阿拉生活周围个家常事体是勿是还可以写写看？”。伊听了倒蛮支持个讲：“可以啊，只要是上海人晓得个事体，侬尽量用上海闲话写。”葛么我胆子“杜”（大）了。想到有趟仔碰着一位长远勿见个同事拉一道吃饭辰光讲起，现在住拉多层高头个老年人上、下楼梯邪气勿方便。我晓得搿朋友早先头买个六楼送顶层个房子，勿要忒“葛算”（合算）噢，建筑面积算算要有头两百个平方米来，房间弄仔好几间，还有健身房里摆仔乒乓台，当时辰光伊勿要忒开心噢。呶，现在年纪上来了，乃么苦相摆出来了。伊忒我讲：“实在跑勿动。只听有关部门拉讲，老年社会了要关心老人跑楼梯个困难，还讲人大代表几年前头就有提案，只听一直拉讲，哪能呒没结果个啦？假使讲是资金问题卡煞，现在就是叫我赞助，我也愿意个。嗳，侬会写文章，帮阿拉再呼吁、呼吁。”我想，对个呀！听到过交关老人侪有搿种个反映，我也住拉六楼，迭种体会勿要忒深噢！就搿能么我结合之相关个情况拨伊拉组织起来马上就写了一篇文章。题目要起了响亮点个，顶好大家熟悉眼个，起啥呢？我想来想去突然想起上海三菱电梯有个广告词勿是叫“上上下下行的享受”么，对应起来阿拉老人走楼梯勿就是“上上下下个难受”？拨大家影响勿是好更加深了吗？对！搿么迭只题目就拨伊叫：
上上下下个难受
“乘电梯是上上下下个享受”，勿过爬楼梯对阿拉老年人来讲实在是上上下下个难受。碰着走楼梯真是心垃荡、腿垃抖。迭个是交关住垃五楼以上老年人个普遍感受。
张阿姨老早前从亭子间里动迁到新公房六楼个辰光感觉邪好：“住楼房就要高，空气好”，立垃阳台浪，像啥有登泰山顶“一览众山小”个神兜兜。搿歇辰光伊刚刚40岁出头，走几层楼梯还勿是松松筋骨个事体。到底年纪勿饶人啊，两三年前张阿姨勿但觉着爬楼梯吃力，而且关节酸痛，囡儿看老娘吃力个样子，劝伊到医院去看看。“迭种老年病有啥看头？顶多弄张膏药贴贴，呒啥花头。”张阿姨勿放辣心浪向，囡儿还是勿放心啊，硬拉老娘去看专家门诊。伤骨科专家王教授问伊：“住几楼啦？”张阿姨讲：“六楼”。“六楼忒高了，住到下头点，要末住到电梯房去，侬迭种介毛病再登六楼越来越严重。”阿姨勿明白了，问：“勿是讲要锻炼吗？”“阿拉骨科医生从来勿讲搿能锻炼！”王教授写完处方，再关照一遍：“顶好勿走楼梯。”看来调房子是解决毛病个根本唻。
调房子哪能像伊讲讲介便当？要出钞票去卖个。断命个六楼又卖勿出价钿，老夫妻俩省吃俭用只多了几个养老铜钿，看看房价蛮高，还想等等有便宜点辰光？囡儿是蛮好，跟爷娘讲：“钞票勿够我贴眼。”大家就去房产中介挂了牌。喔唷！接下来几天乃末闹猛煞来，电话来之勿少，便宜合适个房子倒呒没，侪是辣买房忽悠：“阿姨啊，该出手时就出手；张阿姨快点买噢，再勿买要后悔一辈子个。”张阿姨拨拉烦煞了：“我阿里有一辈子？半辈子都差勿多了。”回想想迭几年个房价就像自家把年纪，只有增长，勿会缩小。迭个楼梯还是要走个呀，只好少买点物事喽。好垃三楼钟家伯伯每听到我拖拖沓沓个鞋皮声，总归会端只凳子出来让我接接力。有日伊跟我讲：“人大代表垃拉呼吁，要拨多层房子造电梯来适应老龄化社会，哎，勿少地方老人作孽啊，下楼一趟，像慈禧太后出宫兴师动众。听说有眼地方辣浪做试验。勿晓得啥辰光轮到阿拉有福气？”
最近几个礼拜看勿到张阿姨下来，难板看到伊辣浪阳台浪朝外望，问伊为啥勿下来，伊讲楼梯实在跑勿动，只好让老头子去上上下下了。大家想想看，搿八十格楼梯，老头子还能爬几年？
刊于2011年12月13日《新民晚报》上海闲话版
收入《浓浓沪语海上情》上海闲话精编集
学习老爷叔做人想穿点
人个一生想想蛮快个，像我讲起个走楼梯，住拉六楼迭个张阿姨，当年立垃阳台浪，像啥有登泰山顶“一览众山小”个神兜兜，现在年纪勿饶（niao 袅）人，爬勿动来，再也勿神气了，郜老讲人老了要想穿点。葛么讲归讲，勿过有“几或”（多少）人真正能想明白个，难怪有人讲，战胜自家是最最难个。
我有个爷叔，就是我外公个外甥，我姆妈个表弟，照正常个称呼我应该叫伊娘舅，勿过阿拉本地人认为爷叔是本族本宅浪个，叫起来更加亲热，阿拉从小就喊伊“爷叔”个，现在伊年纪老了有辰光我就叫 “老爷叔”了。伊拉有兄弟俩，阿拉叫伊弟弟“小爷叔”。兄弟俩个日脚过得实在勿一样，小爷叔“做人家”（节俭）来勿舍得用钞票，自家住个一套毛坯三室户里还要分割出来出租，有仔钞票就“囥”（藏）起来。老爷叔个思路蛮时尚，用现在个闲话讲“豁得开”。有趟伊到阿拉屋里来白相，吃饭辰光讲仔一套现代老年人应有个生活理念，蛮有启发。伊拨处理生活当中个事体比作数学里个四则运算，哪能做好加、减、乘、除听听老有哲理。理论指导行动，老爷叔常常聚会、旅游，“嘎杜”（这么大）年纪个老夫妻两人还到过广西个巴马长寿村去度假。讲起见过各地个风土人情，伊是兴高采烈声音洪亮，一眼也看勿出是个高龄老人。相比之下小爷叔就可惜了，2010年10月得了肺癌去世，年纪才78岁。真个有钞票还没充分享受人生就眼睛一闭啥也呒没了。多余个钞票弄得几个囡儿摆勿平，老爷叔趟趟讲起搿位弟弟就叹息。老爷叔比小爷叔大四岁，四年过去了86岁个伊仍旧面红堂堂到处白相。迭种介做人才有咪道。
对比老爷叔再想想有排老年人实在想勿穿，自家刻苦了勿得了，拿钞票省拉就晓得贴拉子女，愿意造成迭些个啃老族；还有眼老人怕养老钞票勿够，“塞死”（拼命）想赚钞票。我有个同学，退休了自以为身体可以，伊跟我讲趁现在还做得动，准备再做10年，赚伊个100万元。没想到一年勿到心脏病发作一脚去了，想想作孽啊！还有眼老人该用钞票辰光勿用，钞票到处乱“囥”（藏），结果到人死脱了，钞票寻出来勿是霉就是烂了、碎了看勿出钞票个样子。倷讲讲看，搿些老人个钞票统统勿是伊拉用个。我常庄讲，人老了是该享受生活了，勿要再像年轻辰光讲艰苦创业，只要条件允许可以随心所欲个养老，用自家个钞票心安理得，老爷叔个现实例子正好拨我发挥写篇文章呢。
财产做减法快乐做加法
我有个八十多岁个爷叔，是个乐天派。前枪打来电话：“宝良，明早我来七宝看看侬姆妈，顺便再去老街‘兜兜白相相’啊。”听他爽朗个笑声真让人欣慰，老有所乐拉辣他身浪得到了充分个体现。
叔叔是个退休教师，知书达理健康向上，把几十年做群众工作个经验又带到社区里，搿几年召集仔一帮老头老太，义务组织起“社区老年读报小组”，忒大家一起了解国事、家事，伊还常常拨自家周游各处个趣事见闻跟大家一道分享。更扎劲个是总结了老年生活个四则运算：助人为乐做加法、钞票财产做减法、与众同乐是乘法、心中郁闷讲出来好比除法。
特别是钞票财产要做减法，听听就蛮有道理个。老爷叔讲：“国家拨阿拉个钞票叫‘养老金’，是让我们老人养老用个，用了才叫专款专用，勿用就要比例失调。”爷叔倒也勿是拉吃光、用光、拆光个“三光政策”，而是调整消费结构，依据不同年龄适当留点老本，以防不测，既减轻儿女的负担，也保有自身的尊严。
所以，他在养老生活中实行市场经济为主、计划经济为辅个双轨制，严格控制库存。只要老友圈内啥人有旅游心得，就是叔叔下一个旅游目标，排进长计划，做出预算。拜访亲友和短途郊游就是老爷叔短期计划实施个任务。难怪耄耋老人思路清爽，谈起旅游经历更是侃侃而论，啥叫“空气负离子有益呼吸道”、“农家乐才拨旅游回归自然”咾啥个侪成了老爷叔津津乐道个事体。讲到啃老族跟老年人被边缘化个事体，老爷叔有伊独到个见解，伊认为老年人勿理智个宠爱小辈或者太吝惜财产、勿主动接触社会，才是迭些问题个诱因。听伊搿一番个解释，还真有勿个少启发呢。
老爷叔说：“财产真是身外之物，只有用脱了才是自家个，辛苦一世了，何必再作茧自缚呢?”老人家已是四代同堂，家产早已民主协商各归其主，子女们也老孝顺伊，老爷叔也乐得颐养天年。伊寻开心讲：“人死了财产带又带勿走，一来要早作处理，二来遗产勿能留太多，否则会影响子孙们个安定团结哦。”
根据刊载2012年第4期《金色年代》杂志改编
