老早仔有交关个邻居称呼
讲到老早眼老邻居个关系，凡是住拉老房子脱仔老弄堂个人侪影响老深个。现在大家体会到住拉新公房、商品房个居住环境是相当勿错，勿过相互个关系侪勿太搭界个，就算拉拉一个楼梯浪上下走，面对面碰头也勿打一声招呼。一个小区里向见面多了晓得伊“登拉”（住在）几号里已经勿错了，就是一幢楼里顶多晓得伊住拉几楼几室也蛮好了。郜佬互相谈勿上有啥称呼，即使有眼面熟陌生也只记得有人喊伊张阿姨、李阿姨，要么黄家伯伯咾啥个通称，实在喊勿出伊姓素呢，就爽气点直接喊伊住个房间号头：301阿姨、402老伯伯，虽讲听起来有眼直别别个，勿过总归也是个叫法。想想老早辰光眼老邻舍个称呼花头多来，也有以房间名称叫：像亭子间孃孃、前楼爷叔、后楼舅妈；用籍贯地称呼：苏州好婆、扬州奶奶咾啥个，要么干脆明叫：小宁波、老山东个喊起来也乓乓响。还有嘛学点斯文叫侬声老师、先生，乃么伊拉个家主婆也搭进档子了，就叫“师母”；也有以职业相称：木匠师傅、老皮匠、买糖粥个、吹喇叭个、唱京戏个。顶好白相就是“小八辣子”（小孩）个称呼五花八门侪有个，爷娘摆大饼摊个，“倪子”（儿子）就叫“小大饼”，开煤炭店个叫伊“小煤球”，要是开咸肉店个就索性弄个特别眼个绰号拨叫伊“咸猪头”。勿管哪能叫法，听惯了大家从来勿生气，开开心心拉一道过日脚。直到现在“难板”（难得）拉路浪碰着仔，名字叫勿出还是脱口而出个随叫叫，就像我写《浦东闲话》里叫邻居福康“小早死”（xi）一样。其实就凭迭许多称呼就反映出海派文化个丰富多彩，想到搿些么我索性拨老早个称呼整理出一片文章，侬看看搿些名堂勿少个叫法，阿像是称呼里个交响乐？
邻舍道里个称呼
走拉路浪只听得后面有人叫：401爷叔、401爷叔，我勿晓得伊叫啥人，等有人拍我肩胛，再晓得拉叫我。回转头看有点面熟陌生，伊自我介绍：“我是侬楼下202室个邻居。”我只好难为情个讲：“真勿好意思，现在邻居道里勿大认得。”伊讲：“是个呀，大家只好叫房间号头。”我讲：“要是拉老房子里，大家熟悉来像自家人一样，称呼多来。”
早前头，隔壁邻居从早浪向眼睛张开就碰拉一道打招呼：“前楼爷叔，侬早！”“侬早啊！‘亭子间孃孃’。”“昨日夜头我听见后楼个‘苏州好婆’拉讲，今朝小菜场里开秤早，告咾（所以）早点起来买小菜去”，亭子间孃孃边讲边拿起篮头走出门。看见隔壁“扬州奶奶”带了孙子也走出来：“啊唷喂！奶奶，你家【ga】里头‘小大饼’坏了不得了，门槛精哪！”孃孃学奶奶一口扬州闲话夸她个孙子。因为扬州奶奶个倪子（儿子）是摆大饼摊个，邻居侪叫伊“老大饼”，生个儿子么大家就习惯叫“小大饼”。搿排里叫法蛮多个，煤球店里“老宁波”个儿子，阿拉就叫伊“小煤球”啦，现在其“阿姆”（宁波话,妈妈）也“搿末介叫啦（就这样叫了）。扬州奶奶只要听人家夸奖孙子心里头开心啊：“这小把戏聪明来勿得了，昨【za】天后向房个‘阿毛拉姆妈’拨伊三分钱拿两个大饼，伊都勿肯。”三家头一路讲得热络走到弄堂口，刚巧是“阿毛姆妈”做夜班回来，孃孃叫伊：“王师母夜班转来啦。”因为伊拉老公姓王，垃拉夜校当老师，平常侪叫伊“王老师”，葛么就叫伊老婆“王师母”，伊拉小倪子叫阿毛，有晨光也叫“阿毛啦姆妈”，反正随便叫啥邻舍侪晓得个。王师母看到是老邻居也爽快个讲：“是呀，快点回去睏一歇，对面3号里个‘说书阿姨’昨日拨我一张今朝下半天个评弹票子听书去。”讲好就走了。扬州奶奶一时勿晓得：“啦一个说书阿姨？”孃孃忒伊讲：“呶，住拉对过‘老皮匠’个三层楼浪，有个刚搬来个‘杜（大）块头’侬阿认得？”“哦，常来买麻花、油条个张茄里（旧上海对‘老克拉，等人的又一别称），认得、认得呀。”扬州奶奶想起来有个姓张个白白胖胖，说话文绉绉的：“有人叫伊张笳里，伊老婆个子长长个，小大饼‘叫她长脚阿姨人漂亮哪，原来是说书个？”
菜场旁边就是老虎灶，开门一向老早个。老邻居常来泡开水、吃茶，侪熟悉得勿得了。只见灶前头“老山东”辣加煤，店堂间里向烟雾腾腾，呛得伊捂牢面孔跑到马路浪。孃孃看到后头脚踏车撞过来豪烧（急忙）喊伊：“老山东当心车子！”大家吓煞快，只见一个急刹车，老山东回头看：“哎呀侬这个老邮差别唬俺，性命交关。”车浪个人倒哈哈大笑：“我没迭眼车技哪能好吃迭碗饭？”因为伊个工作就是投递员，车技当然呒没闲话。伊屋里住拉老虎灶过去个裁缝店后客堂，跟”小裁缝“侪是老虎灶浪个老茶客，寻寻开心是再平常勿过个事体了。虽讲”邮差“是旧社会的称呼，勿过”老邮差“一眼勿在乎：“只要讲起大家认得我嘛。”
“就是呀，当时邻居道里个称呼真是五花八门，一声新娘子要喊到儿子讨娘子嘞。”
刊于2012年9月12日《新民晚报》上海闲话版
人就是喜欢追求一种情分
老邻居多年个相处，虽讲有辰光会有磕磕碰碰，吵吵相骂咾啥个，勿过一旦碰着啥人屋里有事体了，大家还是会去帮忙个。要是搬开后再碰拉一道侪会讲起老早眼难以忘记个人忒事体，互相还是用叫惯个称呼，就是叫叫绰号也勿要紧个，搿就是一种情分。对人有情分，对一样有过经历的物事同样会有情分个。我拉兜古玩市场常常会看到红木镶玻璃个迭种果盘盒，就会想起我拉文革辰光花四快钞票就买进搿能样个物事。现在讲起来还有眼故事唻，几十年闶下来也算是收藏品，我就此写篇小文章投拨晚报个民间收藏版，结果呒没一点音信，期间我好像不知趣还发邮件去问过，仍旧没回音，肯定是枪毙脱了。所以我讲投稿碰到像吕争老师搿能编辑真是运道了，我自信好个文章勿怕呒没出路，就像《浦东闲话》一样放拉辣等机会。晚报还有一个“百姓沙龙”个版面，每个礼拜有一个命题征稿，正好有趟征有关收藏内容个稿子，我就发出搿篇文章去应征，果然就登出来了。郜咾大家要相信：“机会总是拨拉有准备个人”迭句闲话。我勿少看来拨人冷落个文章就是焐拉等机会，要像焐股票一样等有行情，挑侬发财。真个有种文章经过一番修改去参加征文比赛，还拿到过“等级奖”。好啦，我“勿开无轨电车”（别扯远）回头请各位看看迭篇回忆文章到底写得哪能啦。
果盘情悠失而复得长相伴
我虽勿属于热衷收藏个人士，勿过对有眼雅趣个小工艺品蛮情有独钟咯。屋里有只中西合璧个红木果盘盒，有着悠悠个故事。30公分见方个底盘里摆拉九个彩绘个瓷盆。九个盆子忒当中一个方盆寓意是“九九归一”。盒盖也是红木边框，线条简洁流畅，盒面镶装一块刻有龙凤呈祥图案，四周车边个玻璃。整个果盘盒集木工、瓷器忒玻璃工艺于一体，造型生动气质华贵，一看就是当时富贵人家摆放南北干果用个。
搿还是拉辣“文革”辰光，有天我荡马路到淮海路旧货商店，看到一位身穿仔一件旧工作服又遮不牢福嗒嗒个中年女人，打开包裹忒里向个估价员低声嘀咕。估价员不屑个讲：“这种介物事寄卖没人要，现卖便宜来西，二三元铜钿。”我凑近一看，是个实用个红木果盘盒。我心里屏勿牢冲动脱口而出：“4元钞票卖拨我。”物主跟我走出店后忧郁个告诉我：“迭是外婆传拨拉姆妈个，现在屋里出事体才呒没办法要卖脱伊。”4元个钞票现在勿算多，拉当时也要抵我将近一个月个奖金了。
包好仔果盘盒我拿回转去。我外公个胆子特别小，闶拉床底个果盘盒被伊发觉了。为了不让这“四旧”个东西害人，伊趁我不拉屋里辰观光拨卖脱了。我晓得后心里勿开心，连忙寻到附近个旧货商店。还好是寄卖，扣脱眼手续费，果盆盒总算是失而复得。乃么我索性拨伊锁进了箱子里了。后来文革结束后，才慢慢较解除对伊个“封锁”。现在每当逢年过节用伊来招待客人，勿要太好哦。
最近我路过一家古玩店，看到搿排里个果盘盒，品相一般个也要卖到2000多元。老板问我有否迭种物事愿意高价出售?其实我不究其升值个潜能，品赏藏品本身个文化以及和历经沧桑的派力个相伴，心里就满足了，搿就是一种情分
根据刊登2012年10月27日《新民晚报》百姓沙龙版改编
搿排里个甜蜜只有自家晓得
现在个交关独生子女，尤其是囡儿生仔小人侪欢喜让自家爷娘来带。瞿家姆妈讲起伊拉宝贝囡儿小珍还辣拉“杜杜皮”（怀孕）辰光就跟自家“谈斤头”（讲条件）了：“侬老早催我寻朋友，早点结婚养小人。姆妈我听侬闲话，肚皮老争气个，将来生下来个小人就拨侬带，让伊跟外婆亲热点。小珍嬉皮笑脸一面拍拍肚皮，一面拍拍老妈个肩胛讲。瞿家姆妈讲，现在侪是独生子女，小毛头少，大家侪欢喜个，最好两方面老人轮流来带带。“我勿要嘛！我相信自家姆妈好！”小珍马上收起笑面撅起了嘴巴。“好，好！以后再说吧”。瞿家姆妈原来看到社会浪嘎许多小姑娘嫁勿出去心里急，是想叫囡儿早点完成终身大事，屋里也好闹猛眼，没想到现在等于买仔股票拨伊套牢了。
其实瞿家姆妈个搿种感觉从有个小姐妹身边就有体会了，老早迭位阿姐做人开心来，常常来约自家出去白相，身浪是穿得“山清水绿”（穿着得体干净利落）后来有仔外甥，忙得兜兜转。勿要讲没辰光出去，就是自家身浪个打扮也浑身“一天世界”（一塌糊涂）伊讲：“整天抱小人“撤屎撤污”（拉屎撒尿）拉身浪向哪能弄得清爽？还要“眼乌子”（眼睛）勿停个顶牢伊，一勿当心迭只“小浮尸”（小孩昵称）就要闯祸。搿天老阿姐抱仔外甥拉摊苦经，小人倒抱牢外婆面孔亲热得勿得了，瞿家姆妈看得欢喜来：“看看小人好白相心里也甜滋滋个。”阿姐朝伊瞟了一眼：“好，侬也快了，搿排里个甜蜜只有自家晓得，前两天老头子生病拉辣医院里挂盐水，我都离不开去陪陪伊、退管会好几次有旅游机会也只好放弃脱。原来想好忙仔一世人生了，退休后有辰光老夫妻一道到外面散散心，即使有了第三代么，两亲家轮流搭搭手，也是享受天伦之乐。没想到囡儿让我独家经营，推也推勿脱。还讲是对我充分个信任，亲家也忒我寻开心讲伊拉“竞争失标”。侬想想叫我哪能讲法？”。
有天瞿阿姨从外面回转来，刚巧听到小珍垃房间里跟人家打电话嘎山河：“我跟阿拉姆妈讲好了，养好小人伊帮我带，自家姆妈好讲闲话呀。嗯，勿好拨婆阿妈带个，侬想以后要是伊拉辣小人面前讲我坏话，小人忒我勿亲热，阿要“懊咾”（懊悔）来勿及。不过伊拉做阿奶、老爹个只要钞票多摸眼出来就是了。哈哈，侬讲，阿有道理？”瞿阿姨听了才觉着，怪勿得现在讲小人跟外公、外婆亲热，原来当外婆个侪顶拉杠头浪挑重担。所以有句闲话讲老人带第三代是“甜蜜个烦恼”。
现在外婆吃香唻
“摇啊摇，摇到外婆桥，外婆叫我好宝宝，我讲外婆邪气好”老早辰光要去稍为远点个外婆家乘车子正像坐摇摆船，摇啊摇畅啦，平常头里只好难般跟姆妈回娘家去看外婆个。所以外婆交关欢喜外甥，祖孙道里热络得勿得了。
爷娘上班去，阿拉小辰光侪脱老爹、奶奶住拉一道个。乃么现在辰光是倒转来了。小人侪跟外婆住拉一道，就算外婆屋里勿大，囡儿带仔小人硬要軋（挤）拉垃一道。就是婆婆辣拉身边头，媳妇还是要花花自家老娘过来帮忙带小人个。做啥呢？“外婆个信任度高呀！”做囡儿侪是搿能讲个。
葛么老爹、奶奶现在阿会失落？勿会个，心里侪懂个呀：“迭个时代讲究竞争上岗，双向选择个，勿过自家个责任性勿好忘记脱，到辰光钞票早点摸出来是真个，总归是外婆辛苦。”搿个亲家迭句闲话上路个，晓得外婆、外公勿单单是体力个辛苦，钞票也要贴脱勿少啦。总算是个明白人。
瞿家姆妈原来担心自家是个“空巢”家庭，就怕老了身边呒没小辈，总希望囡儿住一道有照顾点。乃么有仔外甥囡后机会来了，现在个新讲法是“囡儿带老公，回家寻轻松，提倡公有制，外甥用外公。”乃么三口之家侪来了，弄得瞿家个老夫妻两忙得勿得了，有苦讲勿出。夹忙头里难免漏句把气话，囡儿却喜皮笑脸讲：“啥人叫侬是我个姆妈，否则‘哪能叫世上只有妈妈好呢？叫声姆妈，侬勿是希望闹猛点么？再讲迭是阿拉对侬个最大信任啊，侬忙也是忙得开心啊。”
囡儿对娘信任搿句闲话倒勿错，瞿家姆妈讲：“侬现在出去看看，勿论是幼儿园还是小学个门口头接送小人个老人，侪是外婆、外公。碰拉一道讲出来倒是真心闲话，隔壁敏敏个外婆讲，‘囡儿跟娘容易沟通，小人交拨自家娘带像煞更放心，我是推也推勿脱，弄得阿拉现在一眼也呒没自由’。”瞿家姆妈想想自家阿勿是一样个。俊俊拉外婆讲：“骏骏本来由老爹、阿奶带蛮好，我刚退休，还没安排好自家个打算，囡儿就把骏骏带来了，一声一个要跟牢外婆，叫我讲啥个好呢？弄得阿拉跟伊拉老爹、阿奶道里倒勿好意思。”正讲得气劲头朗，旁边个老伯伯插进闲话：“现在做外婆个吃香噢，阿拉做阿爷、阿奶个想带孙子也勿容易，通过几次协商才弄个轮流带带个资格，”迭句闲话让搿辈外婆们心里殟塞啊：“吃香点啥？真叫是呒没办法，侪讲要阿拉有助人为乐个思想，乃么带孙辈就是从身边做起、从现在做起的最好实践。实际浪让小人拨大家轮流带带蛮好个，大家享受天伦之乐，也让阿拉当外婆、外公有点活络个余地，今朝回转去叫囡儿来商量、商量，勿晓得来讪哇？”俊俊个外婆像寻到仔出路，拉拉自说自话。
根据刊登在2012年9月17日《新民晚报》夜光杯改编
