第十六章
奖券是真的
人老了 ，老朋友道里碰拉一道总爱回忆眼老早仔个事体，有眼影响深物事是忘记勿脱个。前几年上海个五芳斋举办150周年个店庆征文，我马上会想起脱伊有过一趟买寿团个事体，也是算只故事么，写出来就传出去了，结果得了个优秀奖，店方寄来一张50元礼券拨我，也蛮开心个。
趁有趟兜南京路白相到吃中饭辰光，我脱老婆两家头顺便弯道到云南中路浪个五芳斋去，就迭张50元礼券一顿中饭就“找伊牌头”（靠它）吃吃点心是足够了。吃完结账辰光我脱服务员讲，多余个钞票请侬随便配眼小点心让我带走。大概现在钞票有假，礼券也有假个了，看伊拿了仔细辨认个样子，我趁机“豁胖”（吹虚）了：“迭张礼券是倷店庆征文奖拨我个。”伊一听连忙眼睛发光：“哦，爷叔会写文章啊，侬老‘来讪’（有本事）个”。讲完马上转身就走了。老婆笑笑，讲我又“神抖抖”（自豪）了。勿过闲话讲回来，文化人受人尊重还是有个。呶，下头就请侬看看我写个迭篇征文：
难忘个往事
我对上海五芳斋有个故事，搿还要追溯到四十年前个一个有关寿团个往事。
上世纪个69年，我还是个刚参加工作个小青年。十月个一天刚巧我亲眷做七十岁生日，我为了尽份孝心，主动承担了买七十只寿团个任务。当时正当文革高潮，全国人民只有为伟大领袖毛主席过生日，祝伊老人家万寿无疆。老百姓勿兴铺张过生日个。但人生七十古来稀，值得庆贺。我拿了粮票，随手还拿仔条干毛巾，拎起只竹篮出了门。
当时屋里就住拉南市区个老西门，要讲买糕团就到中华路浪有家“老字号”个。勿过碰着有位阶级觉悟高个营业员一听我要买七十只寿团，就以责问个口气：“买嘠许多作啥？”“屋里有用，侬有就买，跟侬勿搭界。”我觉着伊问得勿怀好意，也勿买账地回敬伊。伊竟干脆回绝我：“勿讲清爽就勿卖拨侬。”“勿卖就勿买，没必要跟侬讲。”讲完我扭头就走。拉辣搿阶级斗争为纲个年代里，要是搭上跟政治**个还是小心为好免得惹事生非。那么寿团到阿里去买呢？我“荡拉”（信步）人民路浪，忽然想起勿远个黄浦区就有家“五芳斋”，对！伊也是老牌子啊，勿由得脚下生风快步来到五芳斋。
拉辣糕团柜台外，我指着红色个寿团轻声问里向营业员：“请问买七十只有伐？”接待我个一位老伯伯回答蛮客气个：“买嘠许多一般要预定个，就是现存个统统卖拨侬也勿够。”伊还朝我笑笑：“是老人祝寿用伐？”我又有眼紧张，回答也勿自在：“勿，勿是，是乡下造房子用。”老伯伯也勿多问了，随口就讲：“让我想想办法，“下半日”（下午）侬来看看。”我连声道谢，付清了粮票脱钞票心勿定个“回转去”（回家）了。
“夜快辰光”（傍晚时分），我担心个再次到五方斋，勿晓得寿团有否着落了。迭位老伯伯看到我来了，勿声勿响弯腰从柜台下拿出毛巾盖着个竹篮子递拨我，笑咪咪讲：“拿好了，脱我向老人家祝福。”我还想解释，老伯伯摇摇手讲：“小同志，造房子是买馒头个，晓得伐？当心走好啦。”我顿时觉着面孔浪热辣辣了，尴尬个“戆笑”（傻笑）了。
回到屋里，大家掀开毛巾一看勿禁啧啧赞叹，一张红纸盖拉最上头，下面个寿团用防油纸一层层隔开，迭能尽心勿难看出“五方斋”拉迭种特殊辰光仍然尊重民间个传统文化正是难能可贵。
多年来，我成了“五方斋”个老顾客，脱和蔼个老伯伯熟悉了。有一趟我终于问出囥拉心底个疑虑：“侬上趟哪能为我筹齐七十只寿团个？”老伯伯略有所思地回忆讲：“噢，当时我想能为老人祝寿个侪是和睦家庭，能为懂得孝道个年青人尽点力也蛮开心个，于是我到工场间随便编了个理由，检讨自家忘了登记预定，请点心师傅帮帮忙，侪是老同事么，一句闲话。”原来如此啊，老伯伯虽然讲得轻松，勿过拉我心里却承载了“五方斋”倾心为民个浓浓情意，直到现在我还是久久难忘啊。如今“五方斋”走过150年了，我衷心祝愿：老店承载厚德春风浩荡，后辈传承精髓继往开来。
坐超市班车也写出一篇文章
现在买物事到超市是一桩随便个事体，交关超市侪有班车，讲是方便顾客，其实就是争取买客。虽讲每个超市侪有班车了，关键还要看啥人家物事便宜，班车司机个待人态度哪能，侪是店家个竞争本事。当下老年社会，拉班车浪侪是老头、老太，经常拉各超市兜来兜去领市面，辰光长了大家侪认得了，乘拉车子浪就像一个茶馆店，讲物价、谈斤头嘎嘎三胡倒蛮有劲个。前两年我还拉上班，难得乘班车，发现班车浪有眼事体蛮有趣个，五花八门比乘公交车浪闹猛，乘个次数多了，碰到各种人物脱仔事体，放拉我脑子里开始发酵，觉着拨写出来还是一篇好看看个文章。结果文章写好后就拨上海工人文化宫个《主人》杂志采用了。
拉超市班车浪
眼下个超市、大卖场几乎侪配有免费班车。 每天从早到晚流转拉各小区个门前，总有交关人相约等待，伊拉侪是准备到各自想去个超市。
“来了，来了，迭是好又多个，卜蜂莲花个车还有十分钟，阿拉先去了。”一对老夫妻跟相邻个朋友告别后，互相搀扶着上了车。
“咦，乐购个车哪能脱班啦？”“勿会吧，可能路浪碰着仔事体了，”两个勿曾相识个中、老年人搭上仔闲话了，再一聊侪是同一小区个邻居。“侬看，挂着白底蓝字个照牌个车来了，”“勿错，终于来了。”是个，每个商家个班车侪有各自颜色个基调，红白个是“好又多”、黄、黑个是“易买得”、红色个是“卜蜂莲花”。熟悉了，一看就晓得。
当车门打开，两位刚认识个邻居侪谦让着叫对方先上车，“老李啊侬来啦，刚才紧张啊……，”没等迭位坐拉前排快人快语个大妈讲完，老李已从满车厢惊魂未定、唧唧喳喳个议论中得知班车开出勿久，有位马大哈顾客，只顾了买好个几袋物事，拨自家小人落拉车站里了。急得伊满头大汗，大家也为伊担忧，车子连忙再开回去，还好小人没走开，仍自顾自拉白相玩呢，伊连忙抱起小人上车，乃么辰光就迭能拨耽搁了。老李讲：“我也估计是路上有事体了，阿拉小区门口贴了各商家班车个时刻表，基本浪侪误差勿大，再讲我有辰光也随便去兜兜，啥个车来了，看长远没去过个超市就上去，顺便做眼市场调查，多交几个朋友，就像侬、我相识，还勿是乘班车个缘分。”
“对，阿拉老年人应该出来多走走，大家聊聊心情舒畅，也可广泛了解社会情况，买物事货比三家勿吃亏。”搿位大妈讲着还摸出一张价目单，上面列出各商家副食品个比价。“看看，菜场鸡蛋3元5，‘农工商’买3元，‘春申’搞促销才买2元5。”大家拨大妈精明个商业意识所吸引，赞伊是有心人，大妈戏称伊拉小区有个“比价协会”，一群老头老太除了看商品广告，还有就是坐仔班车各有重点个掌握价格变化情况，然后汇总起来拨大家采用。有人建议能勿能扩大资源公享范围，大妈讲：“欢迎大家到阿拉小区来走走。”
班车一路浪送脱拎着大包、小包个，又迎来前去选购货物个顾客，碰到相识个，互相招呼着：“赵家伯伯，长远勿见，赵家姆妈哪能没一道去？”“噢，张医生，囡儿刚生了外甥，老太婆去帮忙唻。”“恭喜啊，辰光快来，刚动迁来时侬囡儿还是小姑娘，一晃自己也当娘了。”“是啊！阿拉勿是也老了。”正讲着，赵家伯伯发现坐拉旁边个“大肚皮”（孕妇）面色勿对，转过身告诉张医生，张医生赶紧过来关切个问：“啥地方勿适意？”立拉边浪个丈夫也急了问：“侬咋个啦？讲话呀。”听口音是一对外地人，张医生通过搭脉，就怀疑要早产了。马上大声告诉司机掉头开往医院，大家还勿断地安慰伊拉。到了医院，大家一道照顾伊拉下了车，张医生还亲自护送。班车迭才继续上路了。
车厢里又恢复原先个热闹气氛，到了下一站，勿了解情况个顾客难免满腹牢骚：“啥个优质服务，连班车准点侪搞勿好，再等下去，阿拉人也瘫下去了。”当大家哈哈大笑，笑得伊拉弄勿清爽个辰光，有人告诉本班车历险记个故事，伊拉才怀着敬佩个心情向司机投去抱歉个眼光。
班车总算开到商场门口，勿少班车繁忙个拉辣轧进轧出个人群中穿梭而行。一位班车调度拉指挥车子，司机正担心拨调度责骂辰光，勿少顾客抢先帮伊作出解释：“迭位驾驶员真勿容易啊，拉辣伊帮助下顾客两次化险为夷，为倷超市树立了员工个光辉形象。”司机只是笑而勿语，继续开车去接下一班顾客。
看我写得有否道理？
碰到脱后生家谈勿弄个事体，自然会想到“代沟”两字，就是每个人生长拉形成世界观个辰光勿同，吃过苦个人晓得艰苦过日脚是正常个，习惯“做人家”（节约）。生活拉安逸里人叫伊算算了过，认为是“拎勿清”。无论从经济、道德层面浪两代人侪会有观念个碰撞，常常会拨大家心里“殟塞”（郁闷）。所以有句闲话讲“理解万岁”，只要勿影响大事体，大家各归各呒没必要弄得清清爽爽。
我下头写个两篇文章，一是谈谈阿拉迭眼五零后个朋友们。主要还是集中拉“老三届”（指六六年、六七年、六八年个初、高中毕业生）尽管搿里有人年纪相差好几岁，勿过侪是从搿个年代过来个人，观念基本相同个，有勿少人看过迭篇文章讲，“等于拨阿拉迭些人情况让侬形象个描述出来了。”
后一篇是写处理代沟，有勿同方式，我主要拨小辈哪能拨孝敬长辈以婉转个方式来体现，老实讲拉独生子女一代能做到是勿容易了。社会浪多数流传是“啃老族”个例子，勿过有辰光帮伊拆开来分析，各有个各道理。有年轻个勿争气，也有老一辈自愿娇惯，关键是双方要懂适可而止迭个道理。敬老爱老自古有个奉告“子欲孝而亲不在”总是后悔个事体。像我拉文章中写个小张，伊开导爷娘脱新个生活方式接轨，形式浪接受爷娘个资助，实质还是回报伊拉。讲究孝道，主要还是“顺”着长辈为好，伊确实做得勿错个。到底写得哪能？还是请各位看看下头迭两篇文章。
五零后人个良心
现在侪欢喜以年代来讲一代代人，我出生拉上个世纪五十年代，就难免想讲讲阿拉五零后人个良心，五零是指1950年到1959年出生个同胞。最具代表是“老三届”，迭是新中国土地浪最初崛起个一代，是70、80后个爷娘辈，是上辈人翻身后挂着“光荣妈妈”个称号把伊拉带到迭个世界浪来人最多个一代。称之为“生拉新社会，长拉红旗下个革命接班人”。也是共和国震动时骨节眼上个吃苦个一代，长身体辰光遇上国家三年自然灾害“没吃”；求知欲高个辰光碰到十年浩劫“失学”；该深造辰光，全部下放去“接受再教育”；正要担负养家辰光，偏偏又碰着调整产业个下岗、待业；走向老年辰光，又是社会老龄化个高峰期，伴拉空巢、纯老个家庭里成为社会个沉重负担。
勿过搿一代人有良心，伊拉接受革命传统教育，唱着“我们年轻人，有颗火热心，革命当先锋”；对未来充满理想。拉辣困难时总跟前辈比“下定决心，勿怕牺牲，排除万难去争取胜利个劲头。”伊拉崇敬“惟有牺牲多壮志，敢叫日月换新天”个豪迈气概；明确自己肩头个重担；懂得“雄关漫道真如铁，而今迈步从头越”个道理，所以工作有韧劲，伊拉个择业观是党叫干啥，就干啥，职业观是兢兢业业地做一颗永勿生锈个螺丝钉。伊们勿“戆”（傻），伊拉也欣赏“在静静个小河边”；也爱唱“在那遥远个地方，有位好姑娘”；也会哼哼“在莫斯科郊外个晚上”，但伊拉个信念是国家个利益高于个人利益，所以拉那火红个岁月里无怨无悔地奔赴到“希望个田野上”。伊拉个动手能力交关强，因为生活没让伊拉做过“小太阳”、“小皇帝”所以家务老啥勿分男女样样侪会做，水、电、木工、裁裁、缝缝勿是专业就是业余。一般婚、丧、喜事，哥姐几个勿化大钞票就全部搞得定。伊拉个人生观很实在，“家，勿是讲理个地方，是爱个港湾”以至伊拉个婚姻大多数侪相当稳定，今朝伊拉当中个大部分夫妻已白头到老，过了银婚走进夕阳里。
然而伊拉仍旧品尝人间个甜、酸、苦、辣。伊拉把昨日个艰苦生活，看作是人生个财富，甜蜜个回味着，伊拉勿辞辛劳工作着或继续发挥余热，社会浪到处看到伊拉忙碌个身影，社会个公益事业有伊拉，儿孙们个带薪保姆是伊拉，广场舞里是主角，伊拉依然像奔跑拉希望个田野里。面对大量个数字化脱网络化，却一面孔个木呆脱仔无奈。想想离开或即将离开朝夕相伴个钟爱个事业，心里难免有眼酸楚。体衰甚至担负高额个医疗费辰光，会使收入有限个伊拉苦相摆煞。昨日听要改变生活观念，拿明朝个钞票今朝用，叫能挣会化嘛，今朝又讲提倡节约性社会，拨伊拉有眼弄勿清爽了，伊拉本来就晓得为革命节约每一个铜板个道理。有辰光回忆老一辈人为反封建，争取男女自由恋爱个勿容易，庆幸自家能拉月朗星空下跟心爱人牵手，却又被现代个闪婚、提前同居个现象贬为“老土”。想想老早曾为学习革命英雄，而义无返顾去战天斗地，脱眼下追星族个如痴如醉能划等号吗？是否真个落伍了？伊拉困惑、拉反思。即便迭能伊拉依然尽力拉学习新个知识，学上网、学外语，讲是“俏也勿争春，只把春来报”目的要拨自家尽可能跟上时代个步伐，跟年青人缩短距离。脱侬讲，迭就是五零人个胸怀。
孝以“顺”为重
俗语讲，百善孝为先。做儿女个要孝顺，孝以顺为重。尤其现代老人，物质浪勿缺钞票，则是拉辣思维适应脱发展浪有脱节。乃么，做儿女个就更应该拉父母个心理上顺着化点心思，循循善诱搀扶老人跟上时代个进步，就是积极个现代尽孝。同事小张跟我讲起一件家事倒蛮有启发：
小张讲伊爷娘生活特别个“做人家”（节俭），舍勿得化钞票。住上新公房还像拉辣老房子里生活，有冰箱勿用，还习惯于把有眼食物挂拉风里吹；有煤气热水器也当摆设，宁可起早用电水壶趁谷电烧几瓶热水对付白天用；洗衣机经常“待业”。小张跟老人讲过多次，家用电器有其寿命，勿用也得报废啊。可老人总有托词，勿放冰箱是吃新鲜个，早起烧水充分利用电能，有利早睡早起，闲话是讲得蛮有道理，但有眼事体毕竟费神又勿科学呀。比方讲菜市淡季辰光，老人图便宜买多了勿进冰箱就出问题啦，荤个易变质、蔬菜勿保鲜，烧多了吃隔顿，要么就多送小张家里，弄得小张是啼笑皆非哪。闲话讲重了又怕伤老人感情。
后来小张跟父母实话实讲了：“爸、妈，以后阿拉要常回来住住，会拨倷添麻烦伐？”爸妈侪讲，那好啊！勿麻烦。小张顺势又讲：“冰箱还是多年前动迁时带来个，该换了。浴室里来装个电热水器，以后起早只要插上电源勿用再烧水，洗刷、“汰浴”（洗澡）侪可用上。”老两口一听讲侪要换新个？勿是拆人家啊：“儿子啊，旧个还能用，有搿必要么？”小张趁势开导两位老人：“爸妈啊，过去勤俭是条件有限，现在倷老了，便当、健康才是最主要个，生活要讲究质量。旧家电勿安全，再讲阿拉来了也要有个方便啊。物事统统我来买，家里个水、电、煤付费侪已转到我个银行账浪了，倷也勿用操心了。”“那买家电个钞票还是阿拉出，老头子侬讲呢？”老妈抢着发话了。老爸也顺着讲：“是啊，倷也有家庭，阿拉省钞票还是倷个。”小张讲了：“侪是自家人，何必讲客气话，再讲阿拉常回家也要使用，还分彼此。”可父母硬是勿让，讲勿收钞票还是勿用。“哪能办呢？”我探究个问。小张“狡猾狡猾”个讲：“恭敬勿如从命，就收呗，不过我勿会 ‘贪污’。以后慢慢较化整为零拨伊拉用上。譬方讲陪伊们外出走亲访友，讲‘打的’（出租车）省事，倷陪我乘更合算；主动周转或买眼老人喜欢个食品放进冰箱，就讲大家侪喜欢，抓紧吃完；洗衣机充分发挥公用个职能，讲顺便一起用就省水省电。有空就聊聊保健小常识，听听电台里医学专家个建议。让伊拉慢慢个融合到现代生活当中，勿就拉提高伊拉个生活质量吗！”
对啊！听小张迭番“孝”经，是一种启发。现在个老人经济独立，强烈个传统理念跟消费观早已成为伊拉个生活经验，脱快节奏个现代生活难免产生冲撞，道理还得慢慢理，粗暴个干涉有伤感情，简单个资助，老人顾及儿孙于心勿安，甚至有影响老人个自尊，倒做个趁势人情，脱伊拉一道热络个参与，共同享受新个生活乐趣，勿是蛮好么。
后 记
搿是一册全部用上海闲话个语气、语调（除了一眼用作样文个征文原稿外）来写个文章汇集，拨我勿同辰光登拉报纸、杂志浪个文章并且用拉辣构思迭些文章个背景故事串起来，形成一个整块，后来又受到勿少朋友启发，索性拨值得回味个文章也改编成上海闲话文章摆到迭本集子里，拉写作过程中又得到上海“华语文学网”有关编辑老师关照，逐步拉网站浪发表，呒没想到居然还有眼点击率，就此我一章一章个增加。我相信欢喜上海闲话或者想学眼上海闲话个朋友，还有曾经看过我一眼上海闲话文章想晓得是哪能会写出个老朋友们是有兴趣个。
我偶尔用上海闲话写写白相相，无意中拨新民晚报“上海闲话”专版吕争老师个肯定忒仔勿断鼓励，逐步写出了勿少文章，自家觉着写了蛮有咪道个。由此，也提高我向《新民晚报》其它版面投稿个信心。从我近年来有眼收获到能够拨迭些文章用上海闲话编成集子来讲，我真个老感谢伊个。
近年头来，上海随经济个发展，才觉着上海方言个缺失，生拉上海个有眼后生家勿会讲上海闲话，当然担心将来上海闲话会流失，郜咾现在要提倡学眼上海闲话，各方面侪重视上海方言个活动，我迭本集子也算趁搿波浪头来轧轧闹猛。
我要想改编上海闲话个文章蛮多个，就是担心呒没经验只好先摸了石头过河，好拉迭本集子是短文个汇集，适合现在散片式阅读，随时随地拣欢喜个看看。如果讲迭本集子真能拨大家带来兴趣，那么。搿我真要谢谢各位个捧场了。最后我要再次感谢拨我极大帮助个赵丽宏老师、华语文学网个麦穗奇老师以及严超杰老师。谢谢！
侯宝良
二零一五年 五月 完稿
