顺水推舟也要用心思个
就像我手忙脚乱烧菜，勿经意个倒效果蛮好。拉辣平常个事体里也有迭种介当时无意，而结果倒是勿错个，勿过搿当中还是要花眼心思个。就像阿拉有趟子老同事们一道到老瞿拉屋里去聚会，听伊讲起买房子个事体也是搿能个。
老瞿原来住拉市区个老房子勿算小，就是觉着忒倪子、新妇（媳妇）住拉一道勿自由，刚巧有朋友忒伊讲起附近有新楼盘即将开盘，叫伊有空去看看房子，老瞿顺便跟老婆讲起想买房个事体。拉辣“做人家”个老婆想来，迭只老头子讲闲话轻飘飘，买房子！侬有“几或”（多少）铜钿（钞票）？老瞿犟脾气来了：“先凑眼首付款，其余好用公积金贷款。”贷款就是借债呀！老观念侪晓得：“冷拉风里、穷拉债里”。老婆讲借债个日脚勿好过啊，还是勿肯。可老瞿勿罢休忒老婆讲，有空去看看嘛。
有一天老两口吃过夜饭，笃悠悠个散步到售楼处，只见里向人蛮多个，交关人也是来看房个，开发商准备好了勿同房型装修过个样板房，有些人看了中意个房子后正在忒售楼员谈“斤头”（协商）。老瞿夫妻俩也听得起劲，一个售楼小姐朝伊拉走来，老婆就想拉老瞿离开，只见那小姑娘嘴巴浪像吃过蜜糖：“阿姨、爷叔倷好呀，今朝正好开出几套老适合像倷搿排老年人个养老电梯房，阿拉先去看看样板房，搿就叫路过、听过，勿及自家走过、看过。”凭伊迭能个热情，老瞿搀仔老婆就跟去看看了。
到底是装潢过个房间狭气漂亮，厅是厅，房是房，朝南个阳台相当“杜”（大），孵太阳、乘风凉、吃吃茶勿要太赞哦。陪拉作介绍个小姑娘看阿姨爷叔满意个面孔又讲：“顶楼有套同样个房间，还是前两天个价钿，买方只付了意向金，后天到期。要是倷有所考虑，我就设法留拨倷，看看搿两天个卖价又涨啦。阿姨、爷叔，便宜勿是天天碰得着个，反正有电梯，顶楼采光、通风、层高侪没闲话唻”。看小姑娘迭只嘴巴真会讲！老两口答应回去商量了再讲。
实话讲，好个物事侪看得懂，老瞿个老婆也想登好房子，就是“肉麻”（心痛）钞票啊，老瞿想公积金贷款个利率低，自家账面浪也有勿少，每年还有一块补充公积金，有迭能睏拉账浪，还勿是用来买房子早点享受。老瞿个老婆听听么也有道理，乃么就决定买房子了。“后头个事体就勿讲了，迭年头买房子就是中奖，现在老太婆服帖我了。”讲起嘎适意个房子老婆就要讲：
老瞿买房犯犟脾气有远见
老同事讲起老瞿现在个住房条件侪啧啧称赞。老瞿老夫妻两住拉两室两厅朝南个电梯房，宽敞而适意，迭塔还是大家碰头聚会个场所。每当听到老朋友赞叹，老瞿总是心直口快讲：“我是靠公积金有了做人个尊严。
老瞿原来住拉市区老公房，十多年前儿子结婚后，大家挤拉一道老勿便当，辰光长仔难免产生矛盾。为了避免尴尬，老瞿忒老爱人商量，想利用公积金在勿远个地方买一套正拉开发个楼盘改善居住条件。一贯节俭个爱人有眼犯愁：30多万元房款勿是小数码，虽讲公积金贷款利率低，但当时等额还款看开起头每月负担利息蛮重，让伊有眼不安落。而老瞿分析认为，随着房产个商品化、社会老龄化忒仔城市化个加快、家庭小型化个趋势，老年人拥有自己舒适个住房总归是人格尊严个体现。伊坚持要买房！老两口作过测算，公积金拉逐年调整，两人工钿每年又拉增加，还贷能力应该是能胜任个，“到了退休阿拉可以高枕无忧个享受养老生活了。”老瞿还想，即使将来要进养老院，还可用房产当靠山。假使儿子有孝心，房子可作为长辈个回馈。
“我靠公积金有了做人个尊严”成了老瞿自我得意个赞美词，现在啊，伊拉老夫妻两人个生活拉勿少同辈人中也是让人刮目相看。贷款三年多就还清了，随后几年房价大涨，翻了好几倍。老瞿感慨个说，要是当时呒没公积金支持，靠亲眷借钞票买房是勿现实个。他还讲起另一桩遗憾个事，当年连襟就因犹豫不决错过换房好时机，退休后领了20多万元公积金，为改善住房，只得再补贴20多万元只买了套经济适用房，连襟每当讲起这些就懊悔不已。妻子迭个辰光总是讲：“阿拉老瞿辣拉买房搿桩事体浪，犟脾气总算是有眼光了！”
根据刊登在2014年1月17日《新民晚报》房产故事改编
老了勿好侪有犟脾气
前头讲到“老瞿买房犯犟脾气有远见”个故事，老人有自信，坚持自家个想法有了尊严是好个一面，勿过随了年纪慢慢个上来，体力、脑力浪个搭勿够是勿争个事实，拉搿方面阿拉要服老，千万勿好犯犟脾气。比方讲人老腿先老，最常见是老年人走路一勿当心就要跌跤，有数据讲全世界每年有42万多个65岁以上老人跌死，拉伤科毛病当中有一半以上是跌跤引起个。随了中国老年社会个到来，尤其是阿拉上海个老人特别多，提醒、防止跌跤尤为个重要。
2013年上海疾病预防控制中心联合《上海老年报》举办了一次“老年人防跌倒顺口溜”征文。通过征集、评比，最后评选出十个“优秀作品”，作者还应邀到活动现场亲自朗诵。我看到迭只消息，想起仔勿少亲眼看见睏拉医院里跌伤个老人，原因尽管各种各样，一旦跌倒后果侪蛮严重个。勿少老人平常呒没啥要紧毛病，就是跌断骨头长期瘫拉床浪，最后引起其他并发症死了，想想就让人痛心。仔细分析拉平常生活当中有勿少地方是值得阿拉老年朋友要注意个，从夫妻互相照顾、朋友道里个关心，从自身当心到社会关怀，我拨伊侪列出来编出朗朗上口个顺口溜去参加征集活动。题目叫“老年防跌最重要”。真呒没想到啊，结果我还拿了个“优秀作品奖”，主办方来电话邀请我11月8日到复兴公园宣传活动个现场去朗诵呢。
搿天个活动舞台就搭拉公园大草地旁，“兜转”（周围）放了交关宣传防跌个版面资料。来个人勿少，交关就像阿拉迭排里个老年人。活动一开始主持人就宣布得奖个十个人名单，大家排仔队上去领奖，忒我发奖状是上海市疾病预防控制中心个领导，伊轻声忒我讲：“阿拉勿少领导侪讲侬搿只顺口溜写得真好。”我大概是激动，连连点头说谢谢！颁奖后，又是我第一个去朗诵，因为从来呒没啥个舞台经验，谈勿上是朗诵，我就是照稿子去读读。结束后听主持人给出点评，讲我表演得蛮好。天晓得个，伊肯定是拉鼓励我咾。
迭篇顺口溜勿少人看仔侪讲蛮好！为了拨伊更加通俗化、生活化，乃么我拉搿基础浪向逐段用解说词形式来重新整理出一篇文章发拨拉《新民晚报》健康版，希望能让更多个老年朋友晓得年纪是犟勿过个，要多多当心自家周围个起居安全，才有阿拉老年人个生活质量。还拨原来《老人防跌最重要》个题目直接改为《安全起居顺口溜》。
安全起居顺口溜
1随着人口流动量大等社会结构个变化，失独、空巢以及纯老家庭增多。“少年夫妻老来伴”，老伴迭个辰光个作用相当大，手搀手也该成为阿拉老年人个浪漫。看！相扶相伴走进人生个夕阳里，搿是一幅多么温馨个画面：
夫妻本是比翼鸟，出门就该手搀牢，互相提醒多关照，不去拥挤看热闹。
2虽说眼下是老龄社会，但交关老人个心理年龄勿老，老人们频繁参与社会活动，勿少白发苍苍、步履蹒跚个老人还轧道乘公交或超市班车，多吓人哪！要晓得人体个衰退是勿可逆转个，自己还是当心点。要记牢：
岁数不饶要服老，腿脚不便少跑跑，无奈外出路途遥，撑根拐杖作依靠。
3现在参加晨练个老人多于年轻人。锻炼辰光老人要讲究科学个方法，依据自己个身体特点忒气候变化来选择适当个运动方式。切不可人看人或者过分追求运动成绩，以免适得其反。所以，忠告老年朋友：
清晨锻炼讲实效，动作适度不硬套。若遇头晕加心跳，缓缓下蹲莫焦躁。
4人老了必然走在社会个边缘，但老友勿可少，相同个阅历畅所欲言，结伴旅游、聚餐，丰富了养老生活个情趣。尤其老朋友一道走路辰光勿要光顾了说话当心走神，“敢问路拉何方？”当心，危险就拉自家脚下。要晓得：
老友同行情趣高，思想集中路走好，相互搀扶有情调，碰到困难多照料。
5描述老年人自我防护有一句俗语，“吃饭防噎，走路防跌”。跌跤虽然跟疾病、衰老有密切关系，但预防跌跤有勿少个技巧。
当脚着地辰光，除了立稳或抓牢支撑物事外，还要选择适合自家个鞋子。老人个脚骨僵硬还呒没力道，走路脚跟不容易抬高就习惯拖拖沓沓，稍微碰到眼勿平整个地方就容易跌跤，做人家个老人舍不得“堕脱”（丢弃）鞋底早已磨得滑溜个鞋子，就是拉屋里或者去商场、超市等平整光滑个地面，危险仍拉威胁阿拉。请牢记：
慢慢站立再起跑，防止跌倒最重要。鞋子防滑摆首要，不求时髦觅轻巧。
6有段辰光，大家看到老人跌倒勿敢搀起来，怕伊诈人，拨敬老、爱老个行为走到仔尴尬个地步，不过文明社会毕竟邪不压正，见义勇为个事迹还是层出勿穷。问“侬会去搀扶跌倒个老人吗？”相信多数个回答是肯定个，搿充分说明：
文明晚辈兴敬老，知趣老人有好报，若有白发来跌倒，众人相扶佛在笑。
根据刊登在2014年2月17日《新民晚报》健康园版改编
老年社会个养老问题
老年社会里老年人个事体就是特别多，我拉前两年就写过《讲讲伲老人搿辈里个事体》个文章讲眼老年人拉生活当中存在个尴尬。关键每年增加个60岁以上个老年人数量太多，上海拉全国比例最高，2013年统计出有387万人占到上海户籍人口个27%，预计2015年末将达到435万人数。马上就到30%了，想想平均三个人当中就有一个老人，也可能包括一个失智、失能个麻烦老人。再讲现在侪是独生子女个家庭，家庭结构小型化带来是大部分个空巢家庭。有人统计过已占到整个社会家庭数个40%多，包括还有白发送黑发个“失独”家庭，再有拉辣国外定居个相当于“隐性失独”个、两代侪是老人个“纯老”家庭佬啥个，随着老人个力勿从心个碰到自家有困难辰光真个叫一塌糊涂苦相摆煞。现在想进养老院，床位紧张得吓人，有个地方夸张眼讲，就是排队等到“翘辫子”（死了）还轮勿上。告老社会要大力提倡“居家养老”。居家养老想寻服伺老人个保姆呒没介便当，留得牢个，价钿吃勿消，开口就是四千朝上，仅凭自家迭眼养老金统统拨拉伊还勿够啊。
面对像发大水一样个“老人潮”全世界还没碰到过。每年人大开会总有代表会提出严重个养老问题来，阿拉国家底子还算勿上福利性国家，告佬政府现阶段只能做点兜底个事务，就是办眼基本养老、慰老事体。真正要获得改善养老生活质量，还是要根据每个老人个自身经济条件。前两年有人针对有眼房产个老年人，提出保险机构用倒按揭个办法，让伊拉用“以房养老”个办法来提高经济实力。从几年民意调查下来看，接受迭种养老方式个人勿多。主要有两方面个原因：一是机构怕楼市经济勿稳定会带来损失；第二是老人难以冲破传遗产个传统思想。“以房养老”就此成了一只没人接个“烫山芋”。
2013年底国务院有关机构正式发文，拉辣包括上海在内个几个地方作“以房养老”试点。搿能看国家从政策层面浪是肯定迭种拉国外已成熟个养老模式，关键是碰到迭排问题个人要改变自家个思路，我想每个理解“儿孙自有儿孙福”，并有迭方面条件又想提高养老质量个老人，应该想穿点，或许将来就是趋势。结合听到个周围情况我写出搿篇以房养老个文章。
以房养老，伊想通了
我个邻居周先生早年上山下乡，晚育一子。年近三十岁个倪子还没结婚倒拉一趟事故中不幸丧生。伊悲痛来勿得了，迭种界个心情大家可想而知，邻居、亲友劝仔交关辰光伊才喘过气来。“近腔”（近来），我碰到伊讲起了前段辰光国务院有“关于加快发展养老服务业个若干意见”，明确提出了“以房养老”个新模式。“周先生侬勿必忒悲伤，想开眼，喜忧侪是过一天，‘以房养老’侬最合适，呒没牵挂个过好下半世人生，有仔钞票么去外头旅游散散心。”拨我搿能一讲，周先生茅塞顿开，打算回转去脱老太婆商量、商量看。等“以房养老”个试点辰光考虑、考虑。
看待任何物事各人侪有个观念转变问题，以前一谈到空巢、失独等老年个尴尬辰光，周先生总感着自家是“悬空八只脚”——死蟹一只：“空巢吧？子女勿来，倷（na你们）可以过去走走。外地、国外个，现在有网络、视频可以讲讲。就算两代人纯老个家庭周围总归有人拉辣，像我迭能个家庭将来就是孤老……”自从我脱伊交流养老新思路后，有辰光也看到周先生个眉头舒展了。有天伊心情勿错约我吃茶。我刚端起茶杯，伊就急出拉污问我：“以房养老试点啥辰光开始？”我反问伊：“商量过啦？”现在倒是周先生来开导我了：“人要面对现实，就是独生子女健在，也会有各种不尽如人意个事体，开心个日脚要靠自家来过。”看来伊个观念转变蛮快，伊告诉我有关专家预测，估价200万元个房产参加以房养老保险，每月可得1万元收益。现在伊个迭套房子早超过200多万元了，想想每天有300多元额外进账加上夫妻俩个200多元养老金，哈！日收入要500多元了，只要身体好哪能用得脱？他设想老夫妻俩作一次环球旅游，再写些旅游札记忒仔总结人生个感悟，拨小日脚过的充充实实。
“以房养老”之所以还有阻力，还因阿拉老百姓觉着迭有眼败家子、拆人家个做派，勿作兴个。有人讲“周先生是一个人吃饱一家门勿饿，阿拉有子、有孙哪能做得出来，要拨后代骂死了”。其实唯唯诺诺被“啃老”，忍气吞声反“赔笑”，侪是自己惯出来个。理直气壮地维权，懂事个小辈们也会支持。就拉前腔辰光有消息讲，媳妇让婆婆来自家屋里带孙子。有人还巴不得呢，带自家孙子勿是天经地义吗！可迭个婆婆头脑煞清讲明：“带孙子可以帮忙，付2000元月工资。”像啥闲话吗？孙子是侬个,让我付钞票拨侬享受天伦之乐，岂有此理？媳妇一气之下上网去讨个说法。料勿到80%个小辈侪回帖反驳伊：“依法哪条要婆婆非带孙子不可的？”还有人调侃伊：“侬得便宜了，现在寻个保姆哪个不超2000多元的，请个月嫂七八千月薪的都有。”媳妇受教育，婆婆勿失尊严。
再回到“以房养老”上来，空巢或纯老家庭勿就是困难拉没人照顾么？当你有经济实力支撑，尽可以花钞票购买服务。花自家个铜钿图个舒心，凭啥心存不安呢？关键是自家要想通了，每个有“以房养老”能力个人，侪可以像周先生一样舒展眉头个开开心心过日脚。
根据刊登在2014年4月25日《新民晚报》个人理财改编
