人老了，侪会讲到养老问题
我拉搿本书个前头讲仔勿少有关阿拉老年个事体。事实浪现在上海社会已经是严重老龄化了，侬去看公交车浪交关侪是老年人。有一趟车子浪乘客勿多,但座位侪拨老人坐满了，到站后又上来几个高龄老人，抖抖豁豁个，啥人肯让呢？只好我迭个相对年轻眼个老人起来让座，“噢吆!真正勿好意思让侬立起来了。”对面老人抱歉跟我打起仔招呼。我讲：“应该个，老年人多了，互相照顾嘛!”心里想，过去常听人讲，老了、老了，像啥离我还远了，没想到退休后几年，凭我个满头白发，上车就会有人拨我让座，开头还勿习惯，后来上车连买票员还会招呼：“请啥人照顾一下迭位老爷叔。”看看，社会侪承认我老了。
阿拉些老同学、老同事要是碰垃一道，也侪讲点老年个闲话，特别要问身体有啥毛病？今后哪能养老啦搿排里个问题。“以房养老”我写过一篇文章《以房养老伊想通了》，迭个垃国内个新提法拨失独家庭脱仔子女定居国外个老人还好接收，一般人家像啥还讲勿出口。“抱团养老”倒辣垃有眼老年人心中蛮愿意个。有趟我陪老婆看病，一道个病友讲起伊辣垃郊区买了一幢房子，就是打算兄弟姊妹将来老了住辣垃一道有照顾，要是再老了难以自理了，就请几个专职保姆帮忙。我还听到同事道里讲，顶好讲得拢个朋友住垃一道养老，经常约好出去走走，有啥事体也叫得应。想想侪是勿错个养老办法，于是我又写出一篇关于抱团养老方面个文章，结果《闵行报》刊登了，后来新华网个养老专版也登载了搿篇文章。
说说抱团养老
上个月老张跟老同事友良打电话告诉伊：“阿拉楼下有家住户要置换房子，我脱伊讲好，慢慢较去中介去挂牌。侬勿是讲要像老瞿一样将来大家住得靠近点，互相好有个照应吗？迭趟机会蛮好，侬抓紧过来看看。”“好个呀！”友良挂了电话就跟老妻商量抽个辰光就去，还打算叫仔老瞿一道去帮助参谋、参谋。“迭可是实施‘抱团养老’个重要步骤啊”友良随口就讲。
侪听说过居家养老、以房养老、社区养老、机构养老“迭些能个模式，辣垃上海老龄化急剧上升个今朝，推出了90、7、3个养老格局，哪能让90%居家养老个老人有品位，探索脱仔健全各种社区为老服务功能已成为阿拉老年工作者脱老年朋友们津津乐道个话题。由此，一种老朋友道里通过调房子成邻居个“抱团养老”设想也辣垃部分老人中商量起来。
老瞿就是去年从杨浦区搬到老张个楼上，做起了邻居。老早大家每年几次聚会有谈不完闲话，现在是天天好碰头，热络得勿得了，碰到事体相互照应真是“一句闲话”。刚巧两家侪是子女垃国外个留守家庭，相互依靠更讲究务实。年初，老张个夫人正好去加拿大照顾女儿做月子，老张自不量力垃房间里一个人搬来倒去个搞起了居室创意，想拨老婆回来有个惊喜，哪能想到折腾得犯了心脏病，情急之下通知了老瞿，幸亏老瞿马上下楼，拨伊送去医院，虽讲一场虚惊，但真应了一句“金相邻、银亲眷”个老话。是老朋友成了邻居，有时还胜过了子女脱形式上个邻居，其一，独生子女要忙于工作及自家个小家庭哪能随叫随到，其二，现在独门独户个邻居，相邻几年侪叫勿出个真性大名，遇事哪能开得出口呢？老友做邻居了感情自然不一样了，所以迭事体垃老朋友道里传开后，大家觉着有条件作迭种尝试相当勿错，最好垃一个社区或者一幢楼里，一呼百应，即使今后再老了大家侪要有人照料辰光，勿妨统一请几个保姆，开展专业化个操作，蛮有一番养老情趣。
友良就是垃迭番讨论中有了心思，讲起伊，更让人伤感，倪子前几年不幸去世了，白发人送黑发人成了失独家庭，老俩口几乎失去了生活个信心，辣垃以房养老颇有争议个当下，伊拉是没后顾之忧个，就是发觉进养老院没想象中个容易，再讲辣垃陌生人中去建立人际关系，勿如辣垃“抱团养老”模式下顺当，用以房养老个资金脱知根知底个老朋友们生活垃一道，勿要忒开心哦。就搿能么伊托老张为伊寻找机会。现在机会勿来了嘛。
其实友良了解老张楼里个房型，两室一厅相当勿错，就是去沟通一下房价而已，房东是个年轻人，晓得迭些老人个特殊要求，也爽气就拨个市面浪行情价，结果勿经中介，直接去区房产交易所办手续成交了，大家还省了一笔中介费呢。友良看看房子原装修还可以，打算把墙壁稍为粉刷后就可“搬场”（搬家）了。老瞿讲三个老同事住垃一道更加闹猛了，刚刚还有两位老朋友来电话问，要是还有机会，伊拉也想搬过来呢。老张讲笑话了：“统统住垃一个楼里，等于从前个家属宿舍了，迭真叫老有所乐，勿要太扎紧噢！”
根据刊登在2014年10月24日《闵行报》改编
人怕老来单 想办法动起来
俗话讲人怕老来单，就是到年老体弱辰光生活无能为力，希望得到有人帮助，迭种体会勿到老年是想象勿出个。有个住垃阿拉姆妈一幢楼里个老人，因为腿脚勿便当，连二楼也走勿下去，只好天天坐垃开启式个防盗门口，隔门看邻居跑上跑下，要么一个人对着电视机自说自话，看到我总讲“厌气”（寂寞）煞，做人呒没劲啊!有辰光我打电话拨一眼单位里老前辈，伊拉侪讲没事体做垃屋里“孵豆芽”（静待）。有医学专家证实孤单、寂寞容易形成老年痴呆以及抑郁征。抱团养老、社区关心老人个每天问候侪是排弃老年人孤独个方式，老年人需要热闹，因为人是群居动物，有高级思维就有交流个欲望。依我想，老年人想热闹有两方面：一，自身要主动寻寻看自家欢喜啥？或者讲，想学点啥？乃么，眼界宽了，唱歌、跳舞、学书画，做做操、打打拳，就是走走路、散散步也勿错啊。实在走勿动了，坐垃屋里写写字、打打电话嘎三胡也可以啊，化迭眼钞票小意思。倷讲对伐？我大弟弟去年退休还想再寻眼“生活”（工作）做做，伊就是怕空闲没劲啊！我凭自家多年来退休生活个体会脱伊讲，有空想做自家要做个事体，有目标就有追求，忙得太有咪道了。其次，还有老人之间要互相多走动，聚会是勿错个联络方式，生活就要精彩多了。2014年初我垃《闵行报》、新华养老网就登过迭两篇文章。
图的就是热热闹闹
老早啊，老王就盼望每年敬老节、春节个到来，期盼退管会组织老友一道相聚，搿场面难得啊！周围侪是三三两两围成圈个老兄弟、老姊妹搀牢着手、拍拍肩膀迭种能个亲热劲勿起讲伊啦。“嗳，老李难能没脱侬一道来？”老王关心个问眼前老李个老婆，“来啦、来啦，走得动是勿会缺席个”，正辣垃脱其他老朋友打招呼个老李脱下压牢眉毛个羊毛帽笑呵呵地跑上来应答。人那，就是有个思念，每次相聚嘴浪功夫侪用垃唠叨浪了，吃个功能倒是迟钝了，图个就是热闹。
近年，老王看到**以来我们党决心煞住腐败风，制止公款吃喝大见成效，前两天老李来电话说起退管会个同志来打招呼，例行个聚会一概取消。辣垃搿形势下大家侪能理解，勿过阿拉自己聚会照常，“伊讲我包馄饨、饺子内行，到辰光要发挥特长。还通知了老侯，让伊准备做两只松糕、弄盆芝麻蜜汁烤麸、酱爆虾啥个，伊做个咪道勿要太好噢。”老李还一口气报出老瞿、老顾、老林、老周、老刘等十几位老朋友个名字，最后又讲，伊统统布置大家每人带一只家常菜到伊拉屋里去，再叫老婆炖一锅老鸭芋艿汤，热气腾腾勿照样热热闹闹吗。”老王听着像身临闹猛个场面满口答应。
聚会搿天地点突然改到老林个屋里，老李讲，听老林垃老婆讲伊最近体检发现有点关键指标需再复验，害得伊情绪老勿好，既然是老友相聚勿如到伊屋里厢也好趁势劝劝伊。“来啊，来了让我也精神放松点。”老林个老婆是个爽快人脱大家也是曾经同事，伊也嫌被老林“作”了有点紧张，看来大家上门还作用非同小可呢。
老林个屋里是两室一厅，厅勿算小，一只直径一米五个圆台面十几个人围坐刚巧定当，人多气旺，老林拨大家寻开心露出了长远勿见个笑容：“谢谢大家! 谢谢大家!”，老侯先拿出早晨做好个松糕，老王借花献佛招呼大家享用：“搿松糕上过媒体，胜过老字号。”老侯见大家筷头像“豁犀”（闪电般）一样亲睐自己个手艺，干脆再豁胖一番：“呶，迭只‘油爆虾’也上过《新民晚报》。”“晓得、晓得，记得题目就叫‘歪打正着成美食’老瞿抢先讲，“正是拨侬迭只瞎猫撞着只死“老虫”（老鼠）亲家也误以为是名店家买来个呢”。大家尝过后啧啧称赞，侪要伊传授眼本事。大家也趁势统统拿出了各自带来菜肴，一刹眼垃台面浪是眼花落花，勿用客套大家举筷落勺无拘无束，活脱脱是一批老顽童，连心事重重个老林也被搿般能个活跃气氛带动了，闲话慢慢较也多了。老李又拿出了准备好个馅料脱饺子皮，女同事看见仔讲包饺子是伊拉份内事，老王晓得自己也该露一手了，就摆了摆手讲：“勿要急，女同胞们，请“倷”（你们）配合，我来包，保管辣垃每次水开之前有足够个饺子下‘镬子’（锅）”。只看见伊灵活个“手节头”（手指）一捏，一只饺子就脱手了，大家眼睛侪顶牢仔看，真个水没开，一大堆个饺子早已排列起来。“老王侬好去开饺子馆了”老林个老婆惊叹个讲。老王却感叹个讲：“阿拉迭把年纪个人，主要是脱老婆一道享受生活乐趣，所以老林啊，眼睛一睁一闭侪是一天，为啥勿开开心过“日脚”（日子）呢。”看看眼前搿些老朋友啥人侪有难处，看伊拉各有一套，而我老林问题还未查出就萎靡不振像只煨灶猫，岂勿让人家笑话么。老林想到搿嗒，有点精神了！今朝个聚会太值嘞，伊讲：“我深切体会到老朋友勿能少，虽讲现在呒没大规模个组织聚会，像今朝大家各人露一手、热爱生活个互访，勿也热热闹闹吗？“下转”（下回）也看我个本事吧。”
根据刊登在2014年1月《闵行报》改编
挖掘自己潜能 赞赏他人亮点
俗话说：“人怕老来单”迭个“单”啊，广泛指形体浪个孤单脱精神上个冷静，拨自家生活觉着枯燥呒没咪道日脚过得难熬；失去仔老伴就像孤雁，孤雁难飞是事实，要学会明白夫妻总有前、后仙逝个道理，活垃个人要想得开，才能笑对人生；夫妻勿合、激情缺失个人即使有老伴，也凡事感到无精打采个百般寂寞。最吓势势个是搿一类老年人假使勿及时调正自家勿好个情绪，长此以往就容易出现精神障碍，老年痴呆症、抑郁症搿种能毛病侪会勿请自来，养老生活岂不要更加糟糕噢。
有句话讲“人没远虑，必有近扰”，是告诉阿拉随便啥事体要想得远点，多点，积极应对为上策。仅我个人理解，老人要学会挖掘自己个潜能，懂得赞赏别人个亮点。侬就会感到有自信、感到“有朋之远方来，不亦乐乎”个古话，生活会充满精彩。勿要光看明星耀眼，其实每个人内心都深“囥”（藏）某些个亮点，要能挖掘出来经过修炼，也会让人家刮目相看个，我是老欣赏迭句闲话个：“明星来自老百姓，下个明星就是侬”。勿仿先讲讲自家吧，我喜欢写写、画画、拍拍照片，仅此个人爱好而已，更没啥出类拔萃个记载，但开放个社会拨了我发展个空间，我个好胜性脾气迎合当下个竞争社会，各类“征文”触发我个激情，虽有了把年纪，但我仍有股初生牛犊不怕虎个蛮劲，“敢”字当头倒让我闯出了一条路，就是挖掘到了自己个潜能，辣垃各类征集中常有中标，有人奇怪了：“以前哪能没发现侬有迭些才能”？连我中学个班主任也觉着弄勿懂：“看勿出侬是‘老来中举’啊！”有人寻我开心，称我是征文专业户、得奖常客。我自得其乐是经历个过程，有细心酝酿、辛勤耕耘、呼之欲出到期待揭晓等一系列乐趣伴随侬找到了老有所乐，侬讲能勿快活吗？
我个老有所为也离不开同事、好朋友个鼓励，成为我继续努力个动力。我有一位博士朋友，伊经常用赞赏个闲话来鞭策我勿断进取，当我为自家年记大了觉着困惑个辰光，伊讲：“‘愿随心起’任何时段只要用心，侪会有出彩点。”还用齐白石、梅兰芳搿些名人故事来激励我。我感谢伊个帮助，伊却讲，会欣赏、赞赏你，其实我也得到快乐！搿让我想起台湾个星云大师曾经讲：“给人一句好话，侬才能得到别人回侬一句赞美；给人一个笑容，别人才能对侬回眸一笑。”由侬个赞美去发掘别人个潜能，有侬个鼓励帮助别人成功，勿仅是与人和睦相处个艺术，更是一个人个胸怀。我也学着去赞美别人个亮点，老同事郭师傅喜欢拉手风琴为口琴乐队伴奏，常常免费为公众演出，有人勿理解伊，市场经济了哪有贴钞票去演出个。我想起现在老人们个精神面貌侪垃发生根本个变化，自费办时装走秀、戏曲表演老啥个十分普遍，真是新时代老人有追求个特征。我赞美伊，伊像寻到了知音脱我有讲勿光个闲话，讲伊拉口琴队里各种有趣事体，伊快乐极了。我么从写作个角度去捕捉和揣摩，也得到了勿少信息，有些谈资还成了我写作个素材呢。
“人”啊就是群居动物，只有一撇一捺才竖得起有模有样。
根据刊于2014年10月“新华养老网”改编
