迭种介事体倒要提醒大家个
做人侪想开开心心、太太平平过日脚，勿过有辰光莫名其妙碰着触霉头个事体也会有个。有句北方闲话讲“喝凉水也塞牙。”真个，有一日，我走拉小区个路浪，现在养狗个人家狎气多，散养拉外个狗也常常碰着，见多勿怪了。“眼眼较”我迭趟碰着一只有人牵拉绳子个狗会辣“陌生头”挑起来狂叫朝我小腿撞来，我连忙拔脚就逃，像啥没咬着，因为裤脚管没破，撩起裤脚看，小腿个皮肤也呒啥，像是一场虚惊？勿过总觉着小腿搿里勿大适意，后来发现出现红点，慢慢较又有一小块红斑，乃么我有眼警觉了，想起眼狂犬病个知识。第二天个早浪我顺便路过阿拉社区个卫生中心去问问医生看。叫啥伊一看就叫我快去疾病预防控制中心去打预防针，还叫我到居委会去反映一下。搿能一来，我拨伊弄得有眼紧张起来。好，我先到居委会拿事体个经过反映一边，伊拉也叫我快去打预防针，回头准备告知养狗个居民们重视管好自家个宠物。伊拉还教我去寻到迭只肇事个狗主人，不仅叫伊负责，主要还检查迭只狗个健康状况。道理是对个，可事后我也到出事地方等过几次，哪能碰得着呢？算我触霉头，莫名其妙用脱贰佰六十五块个打针钞票。
勿过防疫中心个医生讲我有警惕性，有人出事体就是认为一眼小事，勿必大惊小怪，没想到狂犬病毒促“掐”（读ka，意为很复杂的毒）有讲勿清个潜伏期，短有几天，长个有十几年，一旦发作无药可救。我拉防疫中心里还看到有关发生拉崇明岛浪个狂犬病报道，有位66岁个老人拨狗咬伤嘴层皮，打过两针预防针，结果拉两个礼拜后还是发病去世了。医生讲，狂犬病毒主要是侵犯人个神经系统，头面部近大脑，病毒侵犯快，而疫苗产生个抗体也有时间，所以一旦拨狗咬伤，抓紧辰光排毒、清洁皮肤顶要紧，勿要忘记快去打防疫针。没想到出仔迭桩事体，我也增加点知识，尤其拉天气热起来，大家衣裳穿了单簿，碰到迭种触霉头个事体要千万勿好大意啊。写篇小文章，一方面吐吐自家个郁闷，另一方面提醒、提醒大家总归也算做眼好事体咾。
天气转热更需警惕狂犬病
狗是人类个别朋友，狗个忠实让人跟伊亲近、疏于防患，勿过狗毕竟是呒没高级思维个动物，伊个捣乱也会拨人造成灾难，典型个就是狂犬病，一旦发作是无药可救必死无疑。
阿拉小区里养狗个居民交关多，我一直小心翼翼脱狗狗们和平共处，就是搿能介，还是拨摊上了“殟塞”（郁闷）。有一日个黄昏头，我走拉辣狭窄个道路浪，看见前头有一个小姑娘牵根绳拉遛狗个辰光，辣陌生头伊弯腰蹲下来，牵狗个绳松了，我没注意就从伊身边经过，没想到迭个辰光狗突然窜出，龇牙咧嘴个朝我小腿撞来，我吓了连忙拔脚就逃，还好狗被绳子拉牢了，我魂也吓出回头看看裤脚管，没破！再撂起裤脚管看看小腿个皮肤也没破，只觉着有眼胀痛，当然也勿去为难牵狗人啦。半夜里我感觉小腿部分有点勿大适意，仔细查看起了红点子，我还是呒没放拉心浪，早晨头路过街道卫生中心顺便进去问问医生，伊一看马上要我“嗷捎”（快点）去疾病预防控制中心处理。
疾控中心个医生发现仔我皮肤浪有红斑了，马上拨我打了两针预防疫苗，还再三关照要全程治疗。我勿明白，皮肤又没破有搿能紧张吗？医生说，狗牙尖了像针样，只要拨它影响过，就是表面没牙印、撮痕，其实皮肤已经拨感染了。老容易拨人疏忽大意个，还有就是狂犬病毒有不定期个潜伏期，往往拉侬勿觉着个辰光就拨伊送脱性命。惊愕之余我想起，曾经有位父亲就是因为帮倪子用嘴巴去吸拨狗咬伤个毒血，“末脚头”（最后）就死拉辣勿重视自家个口腔拨感染仔狂犬病毒。
医生肯定了我个警惕性，搿倒使我要提醒大家了：养狗个朋友们千万要管好自家个宠物，勿要让伊拉自由散漫去危害了别人；居民们也不要若无其事去白相伊拉，特别是辣拉皮肤暴露个春、夏季节里一旦碰着侵害了，勿论当场有否症状，必须忒狗个主人交涉，查清狗个健康状况，更要马上清洁、消毒皮肤，最好还到疾控中心迭排个专业医疗单位去作个预防处理。千万勿能粗心大意啊！
根据刊登在2014年6月9日《新民晚报》健康园版改编
喜冲中秋
清风伴月、月饼开炉，各种各样个月饼老早就拨大家拉进了喜迎中秋个氛围里。今年介我老有运道作为选手参加由《新民晚报》与新雅粤餐馆联合举办的“民间月饼王等你来pk”活动。我呢，平常就喜欢自家做眼点心，还登过文章、去现场做过演示咾啥个。所以搿天仔我蛮有信心，搀仔老婆，还有从国外回来团聚个囡儿一家三口兴冲冲个来到活动个现场，提前去过过八月半个念头。
按活动规则，有30个选手分5组，每组6人分批上场。比赛前有点心师先做示范，然后按组上场，我刚巧是第一组，虽拨了个吉利数6号，勿过拉噶许多人眼门前操作，原来还神兜兜个我也显得有眼抖豁豁。广色月饼我喜欢吃倒没做过，要拨一团120克个油面团忒仔180克豆沙各分四份，以1：1.5比例包出四只皮薄馅多，压模成型必须勿漏馅个月饼再经四个评委以手势正确、制作速度、烘好后个“卖相”（品相），以整体质量标准综合总分来得出名次，是每组第一名就晋级决赛，第二名就算是优胜奖。
比赛开始后，我心稍为稳定点了，耳朵边听有人拉讲：“6号有眼腔调，迭位老兄估计平时会做……”个声音。主持人也凑兴采访我：“爷叔平常头里会做点啥？”我边做边答：“团子、馒头、馄饨侪做，就是月饼头一次做。”闲话停当，四只月饼也做好。计时员兴奋报时：“5分36秒，“隔手”（刚巧）身旁一位女士也完成，‘5分37秒’”。选手们陆续完成后拨饼坯依照号头放进烤盘去烘。从出炉个效果评委对我作品评判也错，我自以为可参加决赛了。最终空欢喜，我只拿了个“优秀奖”。心里懊悔啊！老婆安慰我：“阿拉看重参与，讲究身临其境个意义。”对！主要拉辣传承月饼个技艺，发扬月饼搿排里个节日文化。
搿趟活动主办方有老精彩个策划，连到场个围观者也有奖，三等奖20名获鲜肉月饼；二等奖5名888元个美容卡；一等奖1名是去香港、澳门个中秋旅游。嘿，囡儿运气不错一来就抽了个“三等奖”。最激动是抽一等奖了，被抽中个号码叫啥现场连叫三遍无人应答，主持人征得全场同意作废后再抽奖。没想到伐？，居然是阿拉老婆额角头碰到仔天花板“中头奖”了，拉辣一片鼓掌声中，老婆激动个上台去领奖。坐拉阿拉旁边些围观者侪连连感叹：“迭个一家门运气哪能嘎好啊，一人参赛人人得奖，真是贵人相助！”搿倒是呃，我个奖品礼券奉送拨老婆，2盒新雅特色月饼拉中秋前大家慢慢享用；老婆个旅游奖恰好拨我迭个没去过港、澳个，到辰光跟港澳同胞一道欢度中秋；囡儿得奖个鲜肉月饼正好作为当夜个美味，忒我姆妈四个人开开心心吃顿晚饭。要讲最扎劲是，今年中秋节一家门好尝尝我自家做个月饼啰。
2014年7月27日
趁喜去参加中国月饼文化节征文
趁此喜气我就紧接参加了今年8月份个中国月饼文化节征文。“月饼征文”是《中国食品安全报》每年中秋节前个惯例活动，今年已是第二十个年头了，早拉2008年辰光我发现了伊，当年也参加迭个征文，得过一只优秀奖，奖品是一盒从广东快递过来个正宗“广式月饼”，算算快递费倒开销蛮大个，真个是叫喧宾夺主。
后来我看迭排里征文蛮规矩个，年年要搞一次，所以我就欢喜参加。2010年、2012年我还先后两次获得过一等奖。今年伊拉又照常举办征文了，我想想用自家名字勿妥了，觉着迭种全国性个活动，举办方会考虑参与面总得要有个平衡咯，就算我写得再好也勿可能老是拨我得奖，“一、二等奖”更是勿可能唻，乃么我脱老婆商量，今年是否以侬名字参加，以我迭个老杆子了来执笔，还是有眼自信个。写眼啥物事呢？搿中比赛文章既要贴近现实又要有眼文采个。我脱老婆嘎三湖讲到以前阿拉也常常拿到人家送来个月饼票，去年就少了，今年要勿是去参加新雅个月饼活动，恐怕就象农民家碰着仔灾年是颗粒无收。勿过事关腐败个现象是该要好好较煞一煞了。看看现在月饼市场浪个变化结合拉辣新雅店老总谈有关销售个决策，觉着用月饼个拟人化手法来描述搿些个新气象，效果可能会好眼，老婆想想：“人家侪是讲中秋全家团聚咾啥个，你迭能个笔法人家阿会接受？”我讲结合中央反“四风”精神最行巧，全家团聚、上海个咪道可以通过相关个笔法拨伊适当嵌进去，组织一篇相对亮眼个文章。就迭能我写了读拨老婆听，再讨论修改，有辰光读了两家头熬勿牢笑得肚皮痛。我脱伊讲：“好笑又让人深思，编辑就容易采纳。”就搿能我为迭篇文章起了“月饼沙龙记”个题目，满有信心个发出了。
我晓得，征文举办方常庄把有眼得奖希望个文章提前见报。于是我特别留意近期个登报文章。果然一个“礼拜”（星期）后作为第一篇择优征文闪亮登场了。我嘻滋滋叫老婆来看：“侬看看‘俞爱美’个名字清爽哇”。老婆寻开心讲我侵犯了伊个‘姓名权’。”我讲：“侬将来得奖了还要请客我唻。”老婆侧眉一笑：“侬勿要开心了忒早。”大家想想最终是得啥个奖啊？“二等奖”！虽讲勿是我个名字，勿过，近年头像我得奖多多个人来讲，还在乎迭眼荣誉吗？再讲夫妻两家头讲啥侪是共同财产啊！
2014年8月13日
后来我索性拨伊改编成“上海闲话”个文章投到《新民晚报》个上海闲话版，题目改仔《中秋月饼来聚会》仍旧用老婆个名字，迭种应时个文章一般讲，编辑还是蛮看得上个。结果真个拉辣中秋节个前一天就登出来了。题目后头忒我加仔“谈变化”三个字。看来我以月饼个口气谈变化算是讲到了当前主题，难怪侪蛮受欢迎个。呶，就是下面就是搿篇文章：
中秋月饼聚会谈变化
秋高气爽，一道银白色月光透过朦胧天窗照进了食品店，结束了一整天闹猛个营业，店堂里迭辰光显得特别个安静，当水银样个月光撒拉月饼专柜，忽听有轻声细语，原来是广式个细沙月饼呒没睏着，正辣脱隔壁个百果月饼谈山海经呢。细沙讲：“今年看来阿拉销量蛮好，老百姓侪买了自家吃，当然挑阿拉便宜实惠个，往年用公款送礼哪能轮得上阿拉个份”。百果也讲：“是啊，今年阿拉生意也好，脱脱【tak】仔交关“乌苏”【累赘】衣裳，就迭能个透明塑套，多少轻松还有利环保！大家就喜欢散装个嘛。”岂料伊两个谈话引起弟兄们个兴趣，索性大家开起了沙龙。耶蓉、莲芸侪讲：“以前阿拉也是‘四风’个受害者，有人就爱拿阿拉装扮得虚头怪脑，还拿勿搭界个铁筷子、刀叉啥个伴拉阿拉旁边，有啥必要呢？价钿还乘机斩人家一刀，呒啥人要买，多数是有礼券个人来光顾，最殟塞是拿阿拉当作牟利个敲门砖送来送去，最后闷得浑身长毛生病了，乃末厾到垃圾筒里。今年阿拉也解放了，多数进了散装摊。”潮式个老婆月饼乘机也插上闲话：“所发现个搿些改观，从去年中央个‘八项规定’以及反对‘四风’活动就开始初见成效了，继续顶风个也拨处理脱勿少，讲排场个腐败风正辣遏制。”想想倒是真个，月饼票逐年减少，连每年乘机捞一票个黄牛都叹今年生意难做，准备改行了。听，搿边苏式个水晶玫瑰月饼告枣泥月饼也交头接耳讲得起劲啊，百果大哥熬勿牢拔起仔喉咙：“喂！有啥喜讯？也讲点拨大家听听呀。”水晶妹妹嗲声细气讲枣泥姐刚收到鲜肉月饼一条微信，讲现代人喜爱吃现做现烘个鲜肉月饼，伊拉常常被人家排队争买，临近中秋节了更加是供勿应求呢。还讲起仔一桩邪气感动人个故事唻。
上海“老大房”食品店个鲜肉月饼，是上世纪五十年代传承下来个老字号商品，大家侪欢喜。今天气温高，辣豁豁个太阳下长队里有位老人突然蹲下来，旁边马上有人上前搀扶，还有姑娘帮伊撑阳伞，有人拿来了茶水，大家侪来关心伊，见老人透过气来了才舒了口气。得知老人原来是支内职工，“老上海”难有机会来迭头，宁可费时排队，也要尝尝小辰光只有中秋节有个味道，回忆少年时个中秋趣事。“呒没想到老来不中用啊！”老人尴尬个直摇头。前面个爷叔拨刚买个月饼直接送了老人，老人谢绝，爷叔还是拿月饼放进伊个包里送上了出租车，司机答应免费送老人回去。爷叔隔手【立即】又排到长队后面。今天是伊姆妈个生日，老太太讲好勿要送蛋糕，就要老大房个鲜肉月饼，孝顺儿子是肯定要办到个。“多好个人呐，阿拉月饼就是寄托人间团圆个美好情愿。”枣泥姐发出无限深情个感慨。
迭辰光月光也已移开了月饼专柜，月饼们也有眼困倦了，慢慢进入了甜甜个梦乡，以后个日脚里伊拉将以饱满个姿态，以各自个特色走进千家万户去欢度中秋佳节。
刊登在2014年9月7日《新民晚报》上海闲话版
