眼看大热天就要来了，想起小辰光放暑假，阿拉搿点小巴辣子一道做游戏，唱儿歌童谣个事体。
小辰光一到大热天，阿拉男小人辣穿衣裳方面是最随便嗰，往往浑身只有一条短裤、一双木拖板，一整天赤膊到处跑，无拘无束。有辰光有邻居小姑娘看阿拉穿得风凉眼热，也想学样，阿拉就会一边用手指刮面孔，一边唱：“冬瓜皮、西瓜皮，小姑娘赤膊老面皮！”冬瓜、西瓜侪是阿拉热天最欢喜吃个瓜果，凑啦一道，唱起来还是蛮顺口嗰。
虽然当时暑假里勿流行到处补课上培训班，但是暑假作业还是要每天做嗰。假使啥人一天到夜白相不做作业，被其他小朋友晓得了，大家看到伊就会对伊唱：“赖学精，白相精，书包掼到屋头顶，看见先生难为情！”搿种互相监督学习个效果还是相当勿错嗰，大多数小朋友侪会改正错误。
讲到小辰光热天最开心个游戏，或许要算捉蜻蜓了。一根细竹头，一只小网兜，几根细铅丝，就可以组装出一柄“捉虫利器”。勿过，后来学堂里上课辰光，老师讲蜻蜓是益虫，阿拉搿点小朋友就改捉知了了。记得还有一首专门讲蜻蜓个儿歌：“小蜻蜓，大眼睛，两只翅膀薄又长，飞东飞西忙来西，消灭害虫有本领。”
大热天经常落雨，阿拉小朋友出去白相一般侪勿带伞嗰，落雨就寻地方躲一歇，反正一歇歇太阳就出来了，而且，落过雨以后，天气会风凉交关，所以阿拉侪蛮欢喜落雨嗰。当然，有辰光一时半刻寻不着躲雨个地方，也会淋着雨，被其他小朋友看到，有人就会唱两句：“大头大头，落雨不愁。人家有伞，我有大头。”被调侃一下，阿拉也只是一笑了之。
小辰光一般侪是双职工家庭，假使屋里有小毛头，阿哥阿姐一旦有空侪要帮忙照看。记得邻居有一个小姑娘照看小毛头个辰光最欢喜唱：“弟弟眼睛小，倦了要睏觉。姐姐坐到摇篮边，一边拍唻一边摇。宝宝安稳睏一觉，明朝门口采葡萄。”
记忆里还有一段宣传除四害，搞环境卫生个顺口溜：“六月里个瘌痢真苦恼，苍蝇盯来蚊子咬。消灭四害顶重要，瘌痢听得哈哈笑。”也有人用搿段顺口溜讥讽因为勿讲个人卫生，引起头浪生疥疮个人。有辰光大人也用来吓唬勿肯汏头个小人：“侬看侬头浪介龌龊，勿汏清爽要生瘌痢头嗰”。想想瘌痢头个苦恼，阿拉汏头侪老用心嗰。
吃过夜饭汏好浴，大家侪会到弄堂里乘风凉。搿歇辰光，小朋友白相个游戏侪比较文静，免得再出一身汗。我记得有一种两个小朋友互相用手指掐手背个游戏：一方用左手个拇指、食指与中指去捏对方个右手背，同时念念有词：“哦吆哇，做啥啦？蚊子咬我呀，快眼上来呀。上来做啥啦？”然后两个人轮换。
小朋友一道做游戏，难免有输有赢。假使有小朋友输得急了哭出来，也有儿歌可以“治疗”一下：“一歇哭，一歇笑，两只眼睛开大炮。一炮开到城隍庙，城隍老爷哈哈笑。”
虽然童谣词句简单，内容也勿讲究是勿是符合逻辑，但是让阿拉个童年充满乐趣，即使现在回想起来还是蛮有意思嗰！
刊于2019年6月16日
