现在侪讲垃圾分类，塑料制品产生个垃圾勿少，虽然国家“限塑令”颁布多年，但人个惰性难以改变。搿倒让阿拉想起以前老百姓买物事辰光伊些林林总总个包装方式。
零食“三角包”
椒盐花生、甘草橄榄，盐炒豆、油氽豆瓣等，侪是阿拉馋痨坯要吃个炒货呀，商家侪用纸卷成锥体，倒进食品掖进开口两头塞好，翘起两只尖尖个角活像一只大型个老菱，迭种包装一般用于烟纸店、食品店个零食小包装，相信现在个阿姨妈妈，爷叔、伯伯们辣早年下课回转去个路浪侪有这段美美个回想。
南货“梯形四方包”
去南货店买南、北方个干果，像红枣、桂圆、荔枝、柿饼唠啥。包装搿类食品是用厚厚个马粪草纸，纸质粗糙倒蛮厚实个，现在是勿多见了。店员包装搿排食物辰光老有仪式感，先拨两对角堆到货物当中，再拿另外两对角同样叠到当中，折密封包装个四条缝隙，顶上再盖一张印有店名个黑字红纸，然后用麻绳或者草绳从四边朝中间扎起打个结一拎，就可放心交拨顾客了。迭种包装下方大、上方小，四面呈梯形，土黄色纸犹如一块大金砖，拎拉手里去送礼勿要忒有面子噢。
月饼“圆桶包”
每逢中秋佳节，月饼传统个包装侪有嫦娥奔月图案个精美盒装，讲实惠人家就买眼散装月饼。讲究个店家一般是把月饼横排起来，用牛皮纸或柏油纸包裹两端逐渐往里卷起来，月饼也勿易碎裂。最后就像老早人家包银洋钿用浆糊贴好就可以了，迭能掂辣手里也蛮登样嗰。
通用“纸袋包”
去商店买砂糖、盐，饼干、茶叶之类个食品侪是用勿同个纸袋来包装。糖、盐一般店家用自制牛皮纸袋，有个店家为了节省费用，装盐或老碱个纸袋是利用旧书、废报纸做嗰。假使是零卖茶叶，店家会用质地较好个纸袋包装，一眼有点名气个茶叶店，用个纸袋浪向还会印有店名。
水果“黄篮头”
俗称“黄篮头”就是用细细、薄薄个篾竹条粗略编织成个简易竹篓子。一般可装七八只中等大小个苹果或生梨，上面遮张有水果店招牌个红纸再盖上篓盖，营业员麻利地用细草绳一扎让你提了就走。这种篓装个主要用于送礼。自己享用嘛，还是用报纸糊个大纸袋捧着拿回家喽。
上头搿眼包装技艺有个交关讲究又有特色，侪是店家从业人员个基本功，俗称“吃过萝卜干饭”学来嗰，像“三角包、梯形四方包”夸张一眼讲，就是厾拉地浪侪勿会散包，恐怕现在失传了；“黄篮头”也只能是留辣老年纪个回忆里了，拿伊拉列为非物质文化遗产侪勿为过。要是找回迭些个“失传”啊，垃圾也好少交关来。
刊于2019年7月14日
