前几天乘地铁，辣车厢里看到交关乘客侪拿仔手机看得津津有味。我留心看了看，发现只有少数人是辣白相手机游戏，其余大多数不是看网络视频，就是辣海看小说。搿种情景倒是让我想起小辰光弄堂口个小书摊。
记得老早辣弄堂口个街沿边就有一个摆满各种连环画个小摊。几扇板门样个书架斜靠辣墙旮旯，上面有一排排连环画或平放或斜插叠放辣海，旁边还有七八只小凳。看摊位个多半是住辣附近个老人，看到阿拉迭些常客就会招手：“小朋友，又来新书啦，侬是老主顾，便宜畀侬看，两分一本。”
搿个价钿其实就是当时个行情，一般来讲，小摊浪向个新书可以分为厚薄两种，厚书五分钱可以看两本，薄书两分钱看一本，假使是特别受欢迎个书，也可能上浮到三分钱。至于书摊浪向个旧书一般一分钱就能看两本，如果书比较破旧，一分钱看三本也是可以嗰。类似个摊位附近几条弄堂里还有好几个。
来看书个小朋友既可以坐辣旁边个小凳上看，也可以租几本回家慢慢看，深受阿拉搿点小朋友个喜欢。自打小辰光懂事起，阿拉邻居道里个小人只要有空、有零用铜钿，就侪欢喜到搿搭来。
对我来讲，勿管是夏天辣路灯下乘风凉，还是冬天辣弄堂里孵太阳，只要有几本连环画可以翻翻，就是邪气惬意个事体，家长畀我个零用钿也大多数厾辣伊拉搿搭。有辰光天黑了我还呒没回家，爷娘晓得只要去附近几个书摊转转就可以寻到我。
再后来到了上学个年纪，学堂里有图书馆，凭借书证一次可以借两本书。勿过，图书馆藏书虽多，但大多侪是旧书，新书基本上看勿见，而且连环画之类个“小人书”是呒没嗰。所以，小书摊仍旧是阿拉经常光顾个地方。
我还常常拿从“小人书”里看来个故事添油加醋地讲畀同学听，等伊拉听得津津有味个辰光就卖关子：“请听下回”，让伊拉始终当我个忠实听众。讲到忠实听众，最欢喜听我讲故事个人却是我个外婆。
每当天气变冷，外婆就要为阿拉“翻被头”——用被面和被夹里把棉花毯包起来，四面用针线缝牢。外婆做起针线生活来又快又好，只是视力勿好，需要我帮伊穿针线。每当搿种辰光，我就会滔滔勿绝地讲起伊欢喜听个故事。外婆一边听，一边笑眯眯做生活，有辰光还会点评几句。结束辰光，外婆总要问：“迭些故事侪是小人书里看来嗰？小家伙真聪明，外婆就是欢喜。”
听了夸奖，我心里总是美滋滋嗰，也就更加欢喜看书了。我从看连环画开始，后来订阅《儿童时代》《少年文艺》《中国青年》，要讲我为啥会对文学有爱好，小书摊个作用是肯定勿小嗰。
时至今日，小书摊早已绝迹街头，就连当初个“小人书”也成了许多成年人个收藏品。网络和手机取代了纸张，可以看个内容更多更广更精彩，但是老早子个小书摊总让我难以忘怀。
刊于2018年12月9日
