俗话讲：“人怕老来单”，迭个“单”勿仅指形体浪个孤单，还指精神浪个冷清。我个理解就是，老人要学会挖掘自己个潜能，同时也要懂得赞赏别人个亮点。做到搿两点，侬就会感到自信，生活也会再次变得精彩。
其实每个人内心侪能寻到一眼亮点，只要挖掘出来，经过修炼，也会让人家刮目相看。我从小欢喜写写画画，后来有段辰光又特别欢喜拍照片，勿过，无论是写写画画，还是拍照片，侪只是自娱自乐个水平。后来工作越来越忙，家庭生活各种琐碎事体也越来越多，爱好也只好放下来了。到了现在，有了一把年纪，我倒是还想再折腾折腾，参加了一次“征文”活动，呒没想由此激发了我个激情，挖掘出了自己个潜能，到是辣辣各类征文活动中有了一点收获。
交关老朋友听说以后，侪感到奇怪，就问我：“以前哪能呒没看出侬有迭些才能？”连我中学个班主任也弄勿懂：“看勿出侬是‘老来中举’啊！”还有人寻我开心，称我是征文专业户。其实，征文得奖固然开心，但是对我来讲，写作之前细心酝酿、初稿成文以后反复修改、投稿之后心里个期待，侪是充满乐趣个事体。毕竟做喜欢个事本身就是一种幸福。
当然，辣辣搿个过程当中，也离不开老同事、老朋友个支持鼓励。有位博士朋友就经常用赞赏个闲话来鞭策我勿断进取。我感谢伊个帮助，伊却讲，其实能欣赏侬、赞赏侬，我也蛮开心嗰！搿让我想起曾经听到过个一句闲话：“拨别人一句好话，侬才能得到别人回侬一句赞美；拨别人一个笑容，别人才会对侬回眸一笑。”用侬个赞美和鼓励去发掘别人个潜能，帮助别人成功，勿仅是一种和睦相处个艺术，更是一种胸襟。
有一次看演出，发现老同事郭师傅居然辣乐队里伴奏手风琴。后来碰面个辰光，讲起搿桩事体，我只是称赞了一下伊个演出，伊就好像寻到了知音，脱我讲起乐队里个有趣事体，眉飞色舞，开心极了。人是群居动物，就好像只有一撇一捺互相支撑，才能构成“人”字。
刊于2018年11月25日
