一趟可笑个排队
现在排队个现象少交关了，要是辣过去计划经济个辰光，随便买物事还是办事体侪要排队个，勿要太普边噢，为了抢位置还有摆砖头、放篮头来排队佬啥个。凭票、凭证要排队，更不讲伊勿要票证个物事来。搿辰光个人侪有眼神经兮兮个，大家眼睛里只要看到是有排队个，勿管三七念一？先排了再说！否则就意味失去机会奥佬来勿及。为了怕有人插队，里向管理还蛮到位个，点人数、写号头、发牌子弄得来老顶真个，甚至还直接用粉笔写辣袖子管浪或衣裳浪相，弄得像犯人一样，勿过只要买到了物事就算侬额个头高到天花板来，关伊啥个尊严啦。呶！我小辰光就碰到过一趟好笑个排队。
上世纪六十年代初个一个夏天，我才十一、二岁，有一趟走拉路浪向。本来一条刹静个马路，突然“哗啦啦”一阵风样个奔过来交关人，立时三刻（马上）辣一爿烟纸店门前排起长队。我虽人小蛮机灵，快点趁势朝人堆里一钻，也算是排上队了。队伍里相还勿断有人辣插进来，乱哄哄个有人叫：“嗳！排好啦，勿要让人插队......。”队伍一歇些就排起了前不见头，后看不见尾巴个长队。交关人轧了汗嗒嗒滴还勿晓得是买啥物事？有人只好前后关照一声：“我去打打样（观察），再过来。”阿拉小人勿管嘎多事体，要是买副食品咾啥个？反正阿拉跑得快，回转去再讨钞票也来得及。当前去打听个人回转来讲是买出口转内销“女人用个卫生巾”，勿少男人家就跑脱了，队伍也马上缩短仔勿少。我也想回转去了，呒没料到排辣我后头个阿婆拍拍我肩胛要我留下来，因为每人有限额，伊叫我帮忙凑个份额，我又不好意思“回头”（拒绝）伊。就要当快轮到阿拉买个辰光，不晓得后头有人瞎起哄：“小人不算，还是个男小人，难为情伐？勿要买拨伊。”搿记生活经让阿婆急了胖起仔喉咙叫：“男小人也是人，只要排队个，啥人规定男小人勿好买啊。”拉辣旁边维持秩序个老阿奶出来帮忙打圆场：“好啦，天热来兮个大家勿要吵来，侪有买个。”虽讲我人么小，勿过也有点难为情个，等阿婆辣付钞票辰光，我乘机拔脚就跑。
侬讲迭种能个事体滑稽伐！现在想想我有眼不好意思。勿过拉辣当时辰光一眼也勿希奇个。现在排队当作有秩序个动作，或者是种有气势个场面。郜佬讲啊，勿同环境下就有不同个故事，迭种介滑稽个事体啊就算拨阿拉留个好笑个回忆啰。
母爱勿要焐错地方哦
侪讲母爱是无私、伟大个。但勿一定无私母爱侪是伟大，看看有些过了头个母爱倒是邪起可笑。
前枪天刚冷，有位年轻个母亲带之七岁个倪子到阿拉屋里来白相，夹忙头里宝贝要“撤污”（大便）了。进了卫生间“小浮尸”（小孩的昵称）就是不肯坐马桶。原因是硬板马桶圈浪呒没罩上毛绒垫，小屁股怕冷呐。迭纪当娘个犯难了？可她勿是去鼓励倪子勇敢完成排便任务，而是“母爱”激发了自告奋勇：“姆妈先坐上起铽侬捂捂热。”倪子不懂事体当然开心啦。真勿晓得搿位母亲个“壮举”对小人有啥教育？我老实勿客气指出：“小人大家侪欢喜，勿讲道理个迁就将来只有害了伊。”
同样是母爱，让我想起网浪相曾经有则故事，讲有位妈妈坚持每天长距离个暴走锻炼，为了是拨有肝病个倪子移植自己合格个肝脏；还听说一位母亲为救3岁落水囡儿，奋不顾身跳到河浜里而溺水身亡；更看到过曾经报道过一位母亲为救被毒蜂追蛰个倪子，完全不顾自家脱去衣裳罩垃小人头浪，结果自己被毒蜂活活蛰死等等。搿些侪是母性为小辈个性命义无返顾、听起来天地动容，读来让人可歌可泣。
同样是母爱，自古就有圣明大义个母性，岳母刺字“精忠报国”，培育了名垂青史个民族英雄岳飞；《孟母断织》《孟母三迁》个故事也常常为阿拉后人垂拜。如果讲新版个“孟母三迁”故事，现在倒勿稀奇，但垃垃侪讲实惠个今朝，现代版个“岳母刺字”故事倒难能可贵个。不管培养小人是为成才还是为国争光，至少勿应该有迭种胸无大志去溺爱子女个母爱吧。
闲话还得回到开头个事体：年轻个母亲啊，小人将来走上社会总勿会样样事体侪比屋里称心满意，侬也勿可能始终跟牢伊一生一世。只有鼓励、锻炼伊面对生活个勇气，才能真正“捂热”伊个心。就像古人励志后人成才个告诫：“天将大任于斯人也，必先苦其心志，劳其筋骨，饿其体肤，空伐其身行，行弗乱其所为，所以动心忍性，曾益其所不能。”就是让伊吃点苦头，锻炼、锻炼是呒没啥坏处个。
