上海闲话个素材又拨我拉书展得奖
2014年个上海书展作为新一个十年个开始，又举办了征文，迭次主题是：
“阅读中的真善美——2014我与上海书展”。我想起近几年参加书展个体会尤其从写上海闲话开始，碰到个甜、酸、苦、辣体会蛮深个，还就此拉书展浪参加过“上海闲话”专集首发，征文得奖，我勿仅拉阅读中得到启发，更是拉写个当中逐步实现自家“老有成就”个梦想，由此也破开了《新民晚报》迭块坚冰，成了“上海闲话”版个常客，想想还是有勿少物事好写，是上海书展拨我带来了福气，我仍旧用上海闲话个素材讲自家个亲身体会，讲以往书展里迭眼难忘个事体，题目直接点出“上海书展乃我福地也”。文章发出后，我只想表表心意，勿抱啥个得奖个希望，因为搿次征文只有十个优秀奖名额，勿像书展十周年征文个辰光，100多个得奖名额里我也算轧进了20个“二等奖”里。
九月底征文揭晓了，没想到主办方还增加了十名“入围奖”名额，再次拨我轧进去了，还讲是拉300多篇征文里经专家初选、复选、终评出来个20篇获奖文章。侬讲“上海书展”阿是有贵人相助，是我个福地啊？下面就是我个迭篇征文，看看写得哪能：
上海书展乃我福地也
年年举办的上海书展至去年届满十年，这张在文化界刮得响的名片，赢得万众瞩目，更成了我的神符。去年上海书展和《新民晚报》联合举办“我与上海书展十周年”的征文，我还荣获了“二等奖”呢。
故事要从2010年的上海书展说起，我看到有种书籍里用不少上海方言写的，看看“蛮扎劲”（很带劲），想想许多上海小孩的上海闲话讲勿好，上海的传统都勿晓得，觉得要是失传了确是一桩非常可惜的事。有人如此来弘扬地方文化真是功德无量啊。作为老上海的我也想来试写些“上海闲话”。先写了一篇“浦东闲话”，文章里集中用浦东方言，我一面写一面心里也窃笑。写好后我就投给一家经常投稿的媒体，那编辑收到了稿子对我讲：“文章蛮有趣的，最好改为普通话，否则人家看勿懂。”我想，改掉“浦东的方言”，就没趣了。勿好用！我就留着孤芳自赏算了。适时我看到《新民晚报》上有个“上海闲话”的专版，引起我将这篇“浦东闲话”的文章发给《晚报》的兴趣，这次算是适销对路了，编辑吕争老师认为我文章写得好，鼓励我不断写出好文章。
2012年上海书展前夕，吕争老师兴奋地告诉我《上海闲话》版把一些有质量文章收入专集。书名为《浓浓沪语海上情》，我发表过的六篇文章全部编入其中，并邀我参加当年在书展上举行的首发式。我一草根从去书展淘书到作为作者去参加专辑首发，心中的自豪感油然而生，书展正是我成全梦想个地方。当我抚摸手边这本《浓浓沪语海上情》个上海闲话精编集心情特别的兴奋。在书展上我拜见各位想见已久的老师，特别是我的伯乐——吕争老师。那天她很忙，仅互致一个亲切的问候以她及给我的殷切勉励，足以成了我在书展上又一个的美好回忆。
2013年书展刚发起“我与上海书展十年”的征文，我顿时思绪翻滚勿少相关的写作素材拈手就来。我把写上海闲话与上海书展的情缘有机的联系起来就突出“我”的主题！激扬个文字源源勿断个显现在电脑屏上，题目直接就是“‘上海书展’为我写好上海闲话”。征文揭晓那刻，我正好在邮轮驶向微信盲区的瞬间，那段激动的截屏让我彻夜难眠——“二等奖”里有我名字呀！
插叙
就拉我一面汇集夜报浪登过个十六篇上海闲话文章，一面拉辣用上海闲话改编登过报纸、杂志浪个文章个辰光，有些朋友看仔讲，既然侬迭本书是写上海闲话文章个汇编，“索咖”（索性）拿侬写过个上海闲话个文章统统整理出来，内容可以更加充实。经伊拉个提醒，我就仔细回顾以往写过个所有上海闲话方面文章了。
我从2011年五月份登出第一篇《搿拉浦东人》到2013年底登出《天冷了弄只盐水瓶焐焐》历经两年半了。我一直认为自家“额角头高”（运气好）碰到吕争老师迭能个编辑，大部分文章侪拨报纸登过了，呒没几篇留下来。近两年也就是借了迭股运气我登拉《新民晚报》其他版面个文章也多了起来，真个！以前，几年登勿着一篇文章，现在基本浪平均每月登出一篇。今年年初，我也向新个《上海闲话》编辑表露：有眼原因，我不再为曾经热衷过个版面写稿了，想尝试参与其他版面个写作味道。听朋友们有迭些建议，我就拨手边仅有个四篇文章一道摆进来了，正好出清了存货。
拨阿拉老年人一点温暖
退休后我自然生心（留意）老人个生活状态，老早仔听惯了公交车浪老人刷卡后个搿声“老人卡”个提示音。自从辣拉49路公交车浪听到“敬老卡”个亲切语音，就觉着同样一句闲话，用“敬老”两字对老人就有眼敬重个意思，让老年人感到邪气温暖，现在交关公交车浪侪改过来了，搿就拨阿拉看到了社会尊重老人个风气辣转变了。
有辰光我到社区信息苑办事体，看到服务员热情地接待老人，还告诉啥地方有适合老人个位置、临走辰光客气个关照一声：“物事勿要忘记脱噢，请以后再来哦！”听到搿能些关心个闲话，感到人老了还有眼味道。有老人就讲了：“人老了，脑子勿灵光、腿脚不便就怕拨人家招麻烦，尽量自家识相点，假使拨人家戳几句霉头也勿去计较了。”辰光长了，老人拨社会边缘化也就木嗒嗒了。一旦碰到尊老气氛浓眼个，老人反倒担心阿会又辣搞促销活动？骗骗阿拉老头子脱老太婆；要么是重阳节快到了？侬想想看，搿种酸叽叽个味道说明敬老个意识还有勿少地方要拨乱反正来。
退休前头也有人告诉我，退休前、后是条明显个分割线，原来正常、方便来西个事体，退休后侬要识相点，否则当心自寻烦恼。我还真仔细地留心一番，真是迭能个！原来一些自尊性强、闲话欢喜“直拨笼统”（直率）个老人们侪客气交关，邪气当心自家个一举一动。搿大概就是叫“识相”伐，搿让我想起有句老古闲话：“若要好、老作小”。勿就是辣拉开导伲老年人个做人门槛？搿其中也难免拨一些老人个心里有交关殟塞（逼屈）啊。
今朝有数据表明，上海第一代独生子女个老人中有40%以上是空巢家庭。特别拉浪年老多病个老人当中侪觉着邪气个“厌气”（寂寞）。我常庄（经常）听到有眼老人像啥有介事个对话：“昨天我囡儿打电话来告诉啥好吃个？这有啥稀奇？阿拉倪子老早讲过报纸浪向侪有个。”因为是后生家告诉伊拉，伊觉着难得个亲热，我听仔心里有点难过。随了老年空巢家庭个不断增加，想想自家马上就要碰着个尴尬事体。我常庄想起《常回家看看》里个歌词，搿真是阿拉老人们个心里闲话呵！
大家侪会讲，老人个今朝就是阿拉个明朝，关心老人就是关心自家；或许又会讲，随着高龄老人数个上升，社会拉慰籍老人个措施一时跟勿上。是个！老龄社会个现象早就明摆拉浪，空巢、纯老、失独家庭个相继产生，就是迭个社会里个畸形腔调，勿论哪能讲面对现实总是客观个，葛么，勿管是社会、还是个人，阿拉哪怕是一个动作、一句闲话尽量拨老人一点温暖总可以伐。
剃头就剃头少摆眼噱头
有辰光老百姓道里讲笑话：噱头、噱头就是“噱”拉头浪。勿过道理也有眼，人见面个头一眼看面孔，勿就是看拉头浪么？其实阿拉老早子弄自家搿只头倒是蛮简单，讲究实惠，再考究个也勿过是搨点凡士林来烫烫头发，就是拿电吹风来吹吹。倒是现在个剃头店里噱头势摆足，招牌浪向个名堂多来勿得里个了，啥个“形象设计中心、美容美发工作研究室、新潮发型开发终端、国际流行发型总汇”花头经是透来看得阿拉眼乌子也要弹出来了。
本来阿拉小区里个剃头店老板就是跟阿拉一道从市区动迁过来个，继续为伲老年人脱小朋友服务倒也蛮好，价钿大众化剃个把头就四、五元个钞票，后来讲涨价也只勿过七、八元铜钿好搞定了，大家侪觉着现在随着物价变动调高眼价钿么也算正常。其他社区居民侪慕名而来，郜佬伊个生意一直邪气好。
前枪辰光迭个老板也想起要赶潮流，讲啥要脱时尚接轨，正好趁禽流感隔壁鸡粥店生意不好做，就拨伊盘下来重新装修开阔仔店面，亮出了招牌蛮发噱叫啥：“发艺勿散工作室”大概讨个口彩是集中美发技艺并且效果好个道理，真个要准备从“头”开始“别别苗头”（比试）。全套个理发设施焕然一新，各面镜子前头摆放了交关个五颜六色玻璃瓶像是拉果汁展览，门口还有打扮时髦个迎宾小姐，肩胛还挂拉绶带，上头印仔“美好人生从头而起”字眼；店门旁挂个条幅浪写拉：“进门让我为侬贡献，出门让侬有头有脸。”当然为侬服务个价钿，侬也看勿懂来，动动剪刀几十元，弄眼水搨搨上百元。有个老伯伯讲：“阿拉本来就像毛芋艿头“一塔刮仔”（共计）有几根头发呒啥弄头，只想来剃剃清爽”搿牌里个价钿阿拉是吃勿消，还是到其他地方去吧”。有眼会剃头手艺个人就拉邻居道里互相剃，难怪交关老顾客侪勿进去了。再讲搿剃头店还学起了所谓个引进外来企业文化，每天开门前、还有吃中饭后，男女员工统统立拉店门口一排，伸拳踢腿个一番健身操，嘴里叽里哇啦瞎叫叫。开起头居民只是看看闹猛辣好笑，勿过日常事久个一天几次辣小区里展示迭种介个企业文化，声音响得啥人吃得消啊。纷纷提意见了，乃么引起仔有关部门个重视来干预了，侬看看搿种能个生意哪能会好？
要晓得老里八早个剃头师傅本事才叫“来讪”（在行）剃好了头还帮侬挖挖耳朵、拍拍肩胛松松筋骨佬啥个，勿要太适意哦！侬想想拉辣动迁户个小区里向走高端消费路线，伊本来个人文定位就出了偏差？结果就像伊自家立个招牌叫法一样，“发艺勿散”拨阿拉用上海闲话讲正是：“‘勿二（尼）勿三’。剃头麽就剃头，少摆眼噱头”。
