俗语讲，百善孝为先。儿女行孝理应“顺”为重。交关老人勿缺钞票，就是辣思维浪向有眼脱节。乃么，做儿女个就更应该辣父母个心理上顺咾花点心思，帮助老人跟上时代个进步。呶，同事小张跟我讲起一桩家事倒蛮有启发：
小张讲伊爷娘“做人家”过日脚，勿舍得用钞票。辣新公房里还像辣老房子里一样，有冰箱勿用，习惯拿食物挂拉室外风里吹；煤气热水器也当摆设，情愿起早趁夜间电费半价用电水壶烧几瓶热水；洗衣机更是经常“待业”，一两个月用勿到一次。小张跟老人讲过多次，家用电器也有寿命，就算一直勿用，年数到了也会报废嗰。勿过老人总有托词：“勿放冰箱，好吃新鲜嗰；早起烧水充分利用电能，有利早睡早起”。闲话是讲得蛮有道理，有眼事体毕竟费神又勿科学呀。比方讲菜市淡季辰光，老人图便宜买多了勿进冰箱就出问题啦，荤菜易变质、蔬菜勿新鲜，烧多了吃隔顿，要么就送到小张屋里，弄得小张邪气尴尬。闲话讲重了又怕伤老人感情。
后来小张跟父母实话实讲：“爸、妈，以后阿拉要常回来住住，会勿会给倷添麻烦？”爸妈侪讲：“勿麻烦！”小张顺势又讲：“人多了就调只大冰箱。浴室里嘛再装只电热水器，以后起早只要插上电源，覅再烧水了，洗刷、汏浴侪可以用。”老两口一听侪要调新嗰，就讲：“儿子啊，现在个冰箱、热水器侪呒没坏，全部调脱太浪费了，侬覅拆人家啊。”小张趁势开导两位老人：“爸妈啊，过去勤俭是条件有限，现在倷侪老了，便当、健康才是最重要个，过日脚要讲究质量。现在搿眼旧电器已经用了十几年了，勿安全。物事统统我来买，以后个水、电、煤付费我侪已经办好银行代付了，倷也用勿着再操心了。”“葛末买家电个钞票还是阿拉出，老头子侬讲呢？”老妈抢着发话了。老爸也顺着讲：“是啊，倷也有小家庭，阿拉省钞票也是为了倷。”小张讲了：“侪是自家人，客气话用勿着讲，再讲阿拉回来也要用，勿需要分彼此嗰。”勿过，爷娘也老坚决，讲：“覅钞票就勿同意。”“哪能办呢？”我倒要听听看。小张“狡猾狡猾”个讲：“恭敬勿如从命，就收呗，勿过我勿会‘贪污’。日后我慢慢较化整为零还给伊拉。譬方讲陪伊拉外出走亲访友乘出租，就讲‘倷陪我乘更合算’；主动买眼老人喜欢个食品放进冰箱，就讲大家侪欢喜吃，抓紧吃光；洗衣机共享，就讲阿拉一道用可以省水、省电。有空再聊聊保健小常识，听听电台里医学专家个建议。让伊拉慢慢融合到现代生活当中，老人个生活质量自然就提高了！”
听小张讲“孝”经，我感觉受到启发。现在个老人经济独立，强烈个传统理念成为伊拉个生活经验，与快节奏个现代生活难免产生冲撞，道理还得慢慢理，粗暴干涉有伤感情，简单个资助，老人顾及儿孙于心勿安，甚至会影响老人个自尊，倒勿如做趁势人情，脱伊拉一道热络个参与，共同享受新生活个乐趣，勿是蛮好么。
刊于2019年5月5日
