前几天到南京路逛商场，看到有交关年纪轻个小伙子、小姑娘定定心心坐辣店家里向，用店里提供个彩色皮革和工具仔仔细细制作小皮具。做好以后还可以用机器压花或者绣花，邪气扎劲。我不由想起老早自家屋里做裁片个事体。
啥叫“裁片”？现在个小年轻一般侪不晓得了，但是交关老年人还是晓得嗰。“裁片”就是一种划好线条个布料，老早子比较大个布店里侪有得卖。只要自家屋里有部缝纫机，从店里买回来裁片，用缝纫机踏踏做做，就可以做出蛮像样个衣裳，比从服装店买现成个衣裳便宜交关。当然衣裳有不同款式，顾客身材也有胖有瘦，需要个裁片自然也是不一样嗰，需要请店里个裁剪师傅按照顾客个要求画到布料浪向。布料裁片买回来，需要自家动手按照划线裁剪，剪下来个布片可以送到有拷边服务个地方拿毛边拷好，最后回到屋里向用缝纫机加工衣裳。
除脱“布料裁片”，还有一种“纸头裁片”，就是先量好自家需要尺寸个数据，去照裁剪书浪个公式来算，再辣纸头浪画出实样剪下来。对初学裁剪个人来讲，搿种方法最大个好处是勿会糟蹋布料，哪怕纸样剪错，贴张纸头就可以重剪。假使嫌自家算尺寸画纸样太麻烦，也可以到书店或缝纫用品商店里去买各种印刷好个纸样。搿种纸样里重叠排列或并列出勿同尺寸个图案，只要看清爽编号，剪下来就是一张可以用个纸样裁片。
还有门槛精个人先从排列图浪剪下大个纸样复制，再依次剪下小个纸样，搿就叫买一张变几张。当时会做衣裳个人家，一般侪会囥勿少纸样裁片，需要做啥衣裳，翻出来辣布料浪划出线条，剪下来就是裁片，交关便当。
讲到搿搭，就勿能勿提一下当时做裁片个另外一种操作，叫“套裁”。所谓“套裁”就是充分利用边角料，比如买回来可以做两件大人衣裳个布料，只要合理利用边角料基本可以多裁出一件小人衣裳。葛咾“套裁”迭种方式蛮受当家人欢迎嗰。要晓得当时买布侪要凭布票，所以大家用布也是精打细算，即使套裁勿出一套衣裳，记得有句闲话讲“裤裆里再抠出双鞋面布”也好嗰。用现在闲话讲人人侪是“精算师”。
除脱做衣裳个裁片，还有做包袋个裁片。记得当时蓬莱路浪有家蓬莱皮革市场，专门经营各种皮革、人造革。有一段辰光到皮革市场买旅行袋裁片个人多得勿得了。勿像现在出远门大家侪用拉杆箱，当年一般用旅行袋。为了省钞票，交关人家侪来皮革市场买人造革裁片，再请有经验个熟人做旅行袋。寻勿着熟人也勿要紧，皮革市场旁边就有勿少“代客加工包袋”个摊位，一部手摇缝纫机，勿停个摇啊摇，生意邪气好！
我也做过包袋，勿为赚钞票，纯粹是帮别人忙。那年姆妈有一个要好同事，屋里有三个子女要出远门，需要勿少旅行袋，姆妈就叫我去蓬莱皮革市场买回来好几公尺人造革，我自家设计、划样，套裁出大大小小几个包袋裁片，缝纫机浪换17号粗针，面料浪涂点机油，我亲自上机缝出好几只有模有样个包袋，送到迭个阿姨屋里。阿姨开心得嘴巴也合勿拢，连连讲：“谢谢，谢谢，真是雪中送炭”。剩下来个人造革边角料也呒没浪费脱，我做了好几只皮夹子，送拨奶奶和外婆。
现在时兴DIY，想想勿就是阿拉老早做“裁片”差勿多吗？问题是现在大家手里勿缺钞票，商场里样样物事侪有得买，一般就懒得自家动手做了。至于DIY之所以受到一部分年轻人欢迎，一方面是追求个性化，另一方面则是体验一种新鲜感罢了。
刊于2019年1月20日
