现在勿少人家搬场或装修新房辰光，总要厾脱眼好用个旧物事，小到碗盆锅子，大到沙发衣橱，样样侪有。可惜现今搿些物事连收废品个也勿要。要是摆辣辣几十年前，迭些物事个出路要么是旧货市场，要么干脆拉到门外标价出卖。
荡旧货市场，俗称“淘旧货”。早年头上海有不少旧货市场，南市区个老西门、普陀区个曹家渡等等，凡是闹猛个市面浪侪有旧货商店。其中淮海路重庆路口个国营旧货商场最有名，人称“淮国旧”；还有陕西路复兴路口，陕南邨对面有一个旧货商店，也是比较出名个。后来“旧货商店”又更名为“调剂商店”。由于当时社会刚刚经历几次剧变，辣辣那些特殊个历史时期中，许多人命运变幻，许多家庭发生变故，所以各种需要处置个旧物特别多，可以说只要是国家允许交易个物品，旧货店里样样有。
当时旧物事交易方式主要有两种，一种是商家对货物估价，一手交钱，一手交货，发票盖上“银货两讫”印章，迭种方式叫“买断”；另外一种由卖家确定出售价钿，货物放辣辣商店里，委托商店代售，东西卖出后，商店通知卖家收取货款并缴付佣金，迭种方式叫“寄卖”。
搿眼老旧物品侪带有历史个沧桑感。对我来讲，逛旧货市场就好像进入一条深邃个时光隧道。从伊拉身边走过，仿佛能听到每件物品诉说自己前世今生个故事。我现在用个红木书桌就是外公淘来个旧货，是一家三弟兄吵着分家卖掉个。
当然，围绕这些旧货个也不全是悲情故事，我记忆中就有好几个“旧物牵线，亲人重逢”个喜剧，其中就有一枚银质方戒引出个故事。
那时已经改革开放，有一个陶女士从海外归来，寻找失散多年个姐姐，一直杳无音信。有趟伊去调剂商店，偶尔看到一枚寄售个银质方戒，上面刻个图案跟伊戴了手上个银方戒风格一致，顿时就激动起来。因为搿是伊姆妈生前为姐妹俩定制个一对生肖戒指，阿姐比伊大九岁，属龙。十四岁个辰光逃难路浪送人做童养媳，就此失联。伊姆妈临终还念着大女儿个小名。现在迭枚方戒就辣辣眼前，岂不是说有望找到姐姐了？
陶女士马上请调剂商店联系卖货人。电话打过去，一个男人接电话，讲本来勿想卖迭只戒指，只是老娘生病住院，急需要钱。陶女士急忙赶到医院，经一番仔细辨认，终于见到日思夜想个老阿姐。陶女士对姐姐讲：“我至今独身，侬是我唯一个亲人，迭对方戒寄托着长辈个祝福，还是留拨子孙们吧！”随后，伊叮嘱外甥及外甥媳妇去要回了寄卖个方戒，并承担了姐姐个全部医疗费。
刊于2018年7月8日
