搿枪《新民晚报》登了交关“老字号、新气象”个纪实文章，其中就讲到阿拉老上海个交关物事，譬方讲“民光牌床单、哈尔滨食品厂个‘蝴蝶酥、西番尼蛋糕”佬啥个。好拉搿些物事现在还看得到。可惜有蛮多个老物事现在是看大勿到了。
像老早商店“打烊”（关门停业）搿能有历史气味个排门板现在市面朗基本看不见了，只有七宝老街里还有。
有天清早，我笃散散个走拉老街石板路浪散步，茶馆、糕团店开门最早，看到迭些店家开始卸排门板开门做生意，拨我想到老早小辰光从看大人卸门板到后来自家帮忙掮排门板个感觉。因为我老早就住拉老城厢复兴东路个街面浪，底楼侪是开店人家，侪是用搿排里个排门板。迭种能个物事奥妙就拉辣一条有斜坡个门槛槽里，排门板沿着门槛槽就有前后勿同个高度，每块门板必须要照顺序才好一块块排进去。所以有个店家为了避免弄错，就拉排门板背面编好仔号头。勿过辰光长了，店里人勿看号头就晓得阿里块门板摆拉啥个位置，掮拉身浪或者看看门板浪个特征心里就有数脉个。当然陌生人是肯定弄勿懂个。有趟我就弄错仔还煞死（沪语读“xi”）朝里推，结果退出来也老吃力个。再想想搿脱做人个道理一样：“苗头勿轧苦头吃煞”钻牛角尖是勿来讪个。
一般老物事侪会有段自家经历过个故事，就好像大家对“中华老字号”特别相信一样。已故女作家程乃姗2012年下半年就写仔勿少老早吃个、用个物事。甚至老牌子个来历、价钿侪写得邪气清爽，真勿容易。
伊讲起吃咖啡要用小杯子，冲进去咖啡茶后一把小调羹慢慢较调一调。侬看老克勒吃咖啡，低头先闻一闻香味，再眯起眼睛嘴层皮贴近杯子口轻轻个渳一小口。要吃甜个，必须用方糖而勿是随便放眼白砂糖，搿点讲究就是一种文化个品位，就“蛮有腔调”个。有种物事蛮有想象力，比方从前日常头里用个雪花膏，搨拉面孔浪滑爽，咪道香是香得来。有人拨伊对小人讲迭个叫“搨香香”，就三个字拨老早个印象马上会印拉脑子里。
看到迭些写老早过日脚里个物事，我也有交关个回忆，像冷天防皮肤开裂个“蛤蜊油”、热天头防中暑吃个“仁丹”、发痧最好用“痧药水”（正规名字叫“十滴水”，放拉辣“大指末头”搿能样个小玻璃瓶里，大概只有十滴水个量）效果侪老好个。
还有就是女人家每天梳头用个“刨花水”就像现在时髦人用个“定型水”。嗳，迭种泡刨花水个刨花勿是随便啥个刨花侪好泡个，只有用榆木个刨花才泡得出凝嗒嗒样子个水。小辰光我勿懂，到隔壁箍桶店里拿做木桶个杉木刨花放到阿奶个刨花缸里，想做点好事，结果原来一缸蛮好个刨花水侪弄得报废统统倒脱。从此我侪晓得刨花水个来历。
应该讲，现在个物事比老早个物事更加精细，更加好用，但是人嘛侪有怀旧心理，老早子有影响、有故事个事体是忘记勿脱个。
刊于2017年9月17日
