农历个五月初五,因为是月初第一个五，有人就称为“端五”。还有其他原因叫“端午、端阳”个。当作过节辣祖浪向还有交关个传说。勿过五月初五刚巧是古代楚国诗人屈原投江个忌日，大家通常就拨端五节当成纪念屈原个日脚，逐渐也就成了中华民族重要个传统节日了。吃粽子、看龙船、荡庙会辣搿天是闹猛得勿得了。裹粽子更是家家人家个“老生活经”，当家女人侪会个。
我记得小辰光住辣老房子里过端午也真是热闹，基本家家侪要裹粽子。当年我阿奶裹粽子辣邻居道里是高手，伊顶拿手是裹棱角分明个三角粽，只只裹了是弹眼落睛，品种有肉粽、枣子粽、赤豆粽咾啥。来请伊裹粽子个邻舍邪气多，当伊拉粽子煮好后，总归要送几只拨阿拉来表示谢谢。我特别喜欢吃粽子，刚巧配我个胃口。阿奶看我迭能个欢喜，常庄拿包剩个粽箬囥好，碰着乡下有亲眷送眼糯米来，伊就裹几只拨我吃。搿辰光我就担心，将来阿奶老了，裹勿动仔哪能办？阿奶笑了：“葛末有侬姆妈呀！”姆妈辣一旁听了激将我：“侬要吃，就自己学了裹呀。”可惜我就推扳迭口气，学不会搿门手艺。
到底自家姆妈，讲归讲，心里想，从前辣乡下伲屋里裹个粽子蛮“吃价”，现在辣城里迭门手艺也老“吃香”，要是失传倒蛮可惜个。乃末伊退休后每到端午节就向阿奶学裹粽子，就算当时社会经济有眼好转，粽子呒没老早介稀奇，超市里也有买，阿拉还是坚持自家裹。自家包粽子，勿但味道好、吃了放心，更有意义是当作传统文化来传承。我姆妈裹个粽子辣阿奶个基础浪还有了发展，长方个枕头粽里塞仔两块肉，胃口小眼还吃勿脱。伊寻我开心，“是特为脱侬裹个”。每到端午个辰光，姆妈总归裹仔交关粽子送到我屋里来，还让我分点拨邻居。
前几年，姆妈也勿再年轻，伊倒讲出眼心事：“手里没力道，裹出个粽子吃口就差了。”而我对自家个粽子仍旧一往情深：“只要姆妈裹个，勿管哪能侪好吃。”我也听出姆妈担心裹粽子呒没接班人了。就脱姆妈寻开心讲：“老妈来个承上启下，培养下一代么。”阿拉老婆是个聪明人，听懂我个意思：“看来搿副重担是落辣我个肩胛浪啦。”阿拉老婆也是欢喜保持中国人老传统个，伊晓得中国个端午文化深深个影响到周边邻国，越南、朝鲜、韩国、日本侪有过端午个习俗，韩国还把端午文化当伊拉个历史文化向联合国申报注册，“像啥个闲话？”
就迭能，老婆辣拉阿拉姆妈手把手个悉心带教下，搿几年裹粽子技艺是大有长进，还多次参加了社区个裹粽子活动呢。伊不仅传承了原有鲜肉、枣子、赤豆、豆瓣四大特色粽子，还开发了猪油豆沙、核桃芝麻酥个新品种。为适合阿拉老年人个需求，粽子个体形也减肥了，算是与时俱进吧。伊讲糯米搿物事不容易消化，勿要一记头吃交关，反正自家裹个，随时供应。我开心啊，裹粽子辣阿拉屋里代代相传下来了。侬看！端午节来临了，老婆又辣忙裹粽子个准备了。
刊于2013年6月9日
