记得阿拉小个辰光住拉拉老房子里向过端阳节，搿个真叫是闹猛来邪气。
节前头，基本浪向家家侪垃拉预备裹粽子，自来水龙头旁边勿是张家淘糯米、就是周家汏粽箬【niK】，各人家包出来个粽子形状也是各式各样，有三角粽、小脚粽、还有长长方方枕头粽。馅子个花头透来覅去话伊，有鲜肉、咸肉、火腿、豆沙、还有赤豆、枣子脱仔豆瓣咾啥个。顶吃价个是阿拉弄堂口大饼摊里苏北奶奶裹个碱水粽子，迭个味道勿要忒嗲噢！有介许多名堂经，勿叫侬看得眼花落花再怪唻！尤其是拉拉烧粽子迭个辰光，家家楼道里氽出一丝丝粽子个馨香，哈，真叫侬闻得交关适意拉。端午节搿天，邻舍隔壁邪气大方，互相送粽子，就算侬一眼勿会裹粽子也呒没关系个，包侬照样有口福。最开心是自家人聚垃拉一道，雄黄酒末渳渳【mi】，尝尝香糯爽口个粽子。看看旁边交关小人额角头浪用雄黄写个“王”字，特别是穿开裆裤奔来跑去个“小把戏”更扎劲。就算拉拉三年自然灾害个辰光，逢端午节时，国家还是计划拨阿拉每人几斤糯米，物事虽讲勿多，粽子翻勿出啥个花头经，勿过粽子清香扑鼻脱仔邻居们个友情照常，浓厚个端午气氛还是一眼勿减。
改革开放后，物质条件勿断好转，吃粽子老早勿算啥个时令食品，当作日常点心经常摆垃浪食品店跟超市里，多是多得来勿稀奇。新花头也勿少：有小巧玲珑迷你粽，成双成对叫啥情侣粽。不过阿拉还是看相“嘉兴肉粽”跟五芳斋个“咸蛋黄【huang】粽”，毕竟是中华老字号嘛。尤其搿个嘉兴肉粽吃口肥而勿腻，难怪路过嘉兴个人侪勿会空手回转去。
今年个端阳节又要来了，虽讲现在自己裹粽子个人家勿多见了。勿过，我一直欢喜吃屋里自家裹个粽子，小辰光是阿拉阿奶裹；阿奶老了，我动员伲姆妈裹，前几年姆妈也老了；乃末我担心要断档，就花花阿拉老婆快点学，所以搿两年又吃自家个传统粽子了。过节嘛就要讲究民族文化个传承，特别是民间迭种热热络络个氛围。阿拉真个蛮欣赏近年头里弄里组织大家自包粽子迭种介活动。满街粽子清香，难免会勾起我对粽子特有个感情。
刊于2012年6月20日
